前財經主播林芷彤突破20秒讀130字 流住嘻哈血:我鍾意聽農夫

撰文:
最後更新日期:

1秒rap9個字,你得唔得先!(影片截圖)

「以上嘉賓係金管局同證監會嘅持牌人,以上談及嘅結構性產品並無抵押品…」呢段130字難讀過急口令嘅免責聲明,係兩年前,前TVB財經記者林芷彤喺《創富坊》講得栩栩如生。只需15秒,一秒9隻字,真心同歐美Rap God Eminem有得Battle下。事隔兩年,林芷彤唔再係財經記者,但係佢再重現20秒爆seed讀財經資訊,仲有同拍檔一齊緊貼《中國有嘻哈》的節奏,一齊Rap出新世界,兩人唔係普通數白欖咁簡單,有埋flow、tempo,仲有ryhme!

+5
+4
+3

最近做返財經主播,大家又可以聽下林芷彤嘅新作品喇!(Instagram圖片)

記者就問過林芷彤,佢而家開咗個page叫「堅林芷彤」,聽落都覺得貼地,同佢以前係TVB報新聞嘅形象完全唔同。最近佢就加入咗「耀才財經台」做主播,今次重操故業Rap財經,佢話冇所謂嘅豁唔豁出去:「今次其實都當係一個marketing campaign 咁做,有d人可能會覺得財經新聞好悶,所以先想用呢個方法,向大家發放最新嘅股市資訊,我都會繼續正正經經報財經㗎!」有唔少網民見到林芷彤出山,都好期待佢會一直Rap落去,但Rapper 芷彤就話:「好多人都問我係咪會keep住rap,其實我都驚大家嫌我成日rap好煩!」反應咁好,又點會煩呢?

據知林芷彤最新作品,係佢同同事一齊Jam出嚟:「日日完晒節目就幾個主播同幕後同事以及分析員開會,睇下條橋應該點。(好多人話你有Rap嘅天份喎!)我唔敢講自己rap得有天份呀,實俾人派嬲呀。但我係鐘意聽農夫d歌嘅!」林芷彤笑言自己剛剛轉工,連試用都未過,今次要Rap住講財經,都有啲壓力:「老實講,上次條片爆左我都好surprise,因為其實好多同事都有呢個技能。因爲完全無心理準備,條片咁爆我一開頭係驚嘅,因為驚影響個客,所以初頭係完全抗拒睇d remix片同comment,個排訓都訓唔好,好大壓力。但件事過左之後,就開始睇返啲片,其實有啲都幾搞笑!」

林芷彤仲預告自己都會讀免責聲明:「響創富坊時快讀disclaimer係因為節目時間所限,要好快讀晒段disclaimer然後去廣告,否則會令之後既節目延誤。之後我都會做窩輪節目...一定會再聽到我讀disclaimer嘅!不過呢度無time limit...所以唔好expect我會讀得好快…」至於離開TVB之後,林芷彤都仲有同TVB同事聯絡,仲會得閒打下機食下飯,最近就打Mario㖭!



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。