石詠莉扮MC Jin谷新碟：我有啲後悔聽佢講
撰文：何志衡
出版：更新：
前年出過發燒專輯嘅石詠莉(Sukie)今日出新碟「The Hat Trick」，今日就喺fb放咗條片，Sukie竟然蒙面扮MC Jin喺《中國有嘻哈》嘅Hip Hop Man造型係咁搖，鄧健泓則幕後代Rap，事後石詠莉竟留言話：「我有d後悔聽佢講」。
石詠莉扮完MC Jin自己都忍唔住笑。
MC Jin喺《中國有嘻哈》蒙面自稱Hip Hop Man。
石詠莉喺片中一直冇露過真面目，面上貼滿金色紙遮住塊面扮Hip Hop Man，又着上紅色外套笠住個頭，學埋MC Jin用普通話講咗句：「我有freestyle」隨即叫鄧健泓起beat。
Sukie一路搖一路Rap，但佢只係咪嘴，幕後代唱嘅其實係男友鄧健泓，鄧健泓用廣東話都Rap得唔錯㗎：「聽日我會出我嘅新唱片，出到第3張依然有啲怯，但係唔使驚嚇到面青青，因為有你嘅支持會更好聽……」Sukie搖咗成分鐘隻歌完咗終於忍唔住大笑。
鄧健泓年尾將迎娶石詠莉。
網友睇完之後都好欣賞，尤其Sukie扮MC Jin維肖維妙，Sukie就回應：「ahhhhhhhhhhhh…我有d後悔聽佢講」邊個佢？咪就係男友鄧健泓囉！鄧健泓都有回應自嘲：「係白痴嘅！」Sukie於是問：「咁你又叫我做？」幾咁sweet！
石詠莉自5年前Freeze解散之後就個人發展，前年推出發燒專輯「聽聽Sukie’s」令人刮目相看，榮獲IFPI「十大銷量廣東唱片」及「十大銷量本地歌手2015」兩個大獎；鄧健泓早前向Sukie求婚成功，有指今年年底會拉埋天窗，可以話愛情事業兩得意呀！
石詠莉扮完MC Jin話有啲後悔。