馬德鐘大張曦雯22年 做情侶無問題：大家都差唔多年紀
撰文：溫菁莉
出版：更新：
今年適逢無綫50週年，真係邀請了好多演員回巢拍劇，有張衛健，宣萱及林文龍等。離巢兩年的馬神馬德鐘都返TVB拍《跳躍生命線》，今日馬神就與劇中一班演員包括張曦雯、何廣沛、劉佩玥及陳瀅等人於電視城出席拜神儀式。馬神今次同張曦雯飾演情侶，但他們的真實年齡其實相差22年，好似做父女更適合，馬神笑言對呢嗰安排唔意外，「我地完全無generation gap，大家都係差唔多年紀。」另外他透露今次為了回巢，不適推了兩部內地劇集，「損失幾多就唔講喇，唔好用錢衡量，既然接到呢套劇就做好佢。」
馬神同張曦雯飾演情侶，二人年紀相差22年。
+10
馬神仲話今次劇集好多都係未合作過嘅演員，「咁我當然知有呢一班人喇，佢地係俾到驚喜我，演技好自然好有自己一套。佢地都好聰明，有咩偏差一講就明。」提到今次回巢係咪幫仔仔馬在驤入行鋪路？馬神指從來無諗過呢啲嘢，並透露仔仔現時正獨自一人在法國放暑假，「佢嘅路向由得佢自己去做，我又唔知佢係唔係想做呢行，到時佢真係想先考慮，我覺得而家俾佢感受下世界先。」
劉佩玥今次又可以同陳瀅合作，寓工作於娛樂呀！
而首度擔正做女一嘅劉佩玥，就透露自己小時候超鍾意睇馬神嘅劇集 ，「我好記得以前有睇《美味情緣》，《情迷黑森林》，我細個嗰陣邊有諗過之後可以同佢合作。」今次Moon就飾演馬神嘅妹妹，大讚對方好nice好幽默，「其實未拍呢套劇已經認識對方，但未有工作上嘅關係，而我好開心嘅係呢嗰層面都可以做到好朋友，係好難得。」提到今次首度擔正做女一，Moon就笑言千奇唔好咁講，「無論係配角，客串都好我都盡力做。而且我已經唔係一個新人，入行好幾年，好多方面我真係要做得更加好。」至於今次在劇中又可以再同好姊妹陳瀅合作，Moon就表示對方好煩，「真係日見夜見，我覺得拍完之後要分開3個月先。」