King Jer曲線賣廣告失手 李思捷又扮四大天王網友批太低質
撰文：何志衡
出版：更新：
做得KOL於自己page賣下廣告好正常，網絡紅人King Jer都一樣，而且好識得揣摩網民心態曲線賣廣告，但係佢日前就失咗手，事緣佢煞有介事咁分享一段錄音，大家㩒入去聽，先發現「李思捷嚟嘅喂！」結果就搞到網民好反感。
平心而論，King Jer個po其實幾吸引，但就希望越大失望越大。
King Jer個po係咁嘅，有晒伏線，講到有兩個都市傳說，一個係「如果你晌網上搜尋『我真係』，第一個關鍵字就係：『恭喜你呀』」第二個係「如果你喺網上搜尋『十蚊雞』，第一個彈出嚟嘅會係以下呢條聲帶……」
乜嘢聲帶咁巴閉呢？King Jer繼續話：「我反覆聽咗四億次，呢幾把男聲嘅頻率範圍，介乎喺20 Hz至20,000 Hz之間……」跟手仲話好似係幾個天王級人馬晌度唇槍舌劍、針鋒相對，為咗十幾蚊而嘈。下面就放咗段錄音對話兼大大隻字寫住「天王10蚊雞炒大鑊絕密聲帶」。
李思捷經常扮四大天王，大家都聽到熟晒，仲開始覺得煩。
嘩！咁juicy梗係要聽啦！一click段對話就聽到一把疑似李思捷嘅聲，扮緊唔同嘅人自己同自己嗌交，而佢扮緊嘅有啲似係劉德華、黎明等等……都係冇乜意外驚喜嗰幾個啦咁！對話內容就無關重要，因為一班網民都好似冇乜理內容，佢哋嘅留言只係關心一樣嘢，就係「好煩」、「聽到把聲好反感」、「好低汁（質）」等等，有啲就苦口婆心咁勸King Jer賣廣告要挑選一下，否則只會損害佢嘅聲譽。
有網民則批評李思捷：「一聽就知邊個扮」、「其實有幾把聲都唔似，都唔明佢做緊乜戲又屎」、「以為自己係周星馳嘅一條茄哩啡」毫不留情。嗱！呢啲網民意見有時都幾重要，King Jer係咪要留意下呢？
網民留言幾乎一面倒唔like呢段廣告錄音。