【有片】薛家燕十字步後再跳舞 玩拉丁Salsa：最緊要係擰條腰！
撰文：洪曉璇
出版：更新：
「唏呀唏呀唏呀唏呀唏」，係好多人眼中嘅「有聲post」，個腦亦會浮現薛家燕笑到四萬咁口嘅樣。家燕姐自劇集《真情》由「好姨」呢個角色開始復出幕前，再加埋電影《食神》中大嗌「叉燒呀﹗好叉燒呀」嘅味公主，呢二十年來一直以開心果形象示人。當然不得不提，大家都想同家燕姐瘋狂跳嘅十字步啦﹗不過嚟緊要學新嘢啦，家燕姐喺新劇《燦爛的外母》挑戰拉丁Salsa，Are You Ready？
好想瘋狂同家燕姐跳十字步。(影片截圖)
「叉燒呀﹗好叉燒呀」嘅味公主。(影片截圖)
今年五月開拍七月拍完，八月就話播出街嘅新劇《燦爛的外母》，最近密鑼緊鼓開始宣傳攻勢。「See See TVB」facebook官方專頁上載咗一條短片，藝人麥凱程（Alex）去咗探《燦爛的外母》班，身穿桃紅舞衣戴上眼鏡嘅家燕姐坐喺餐檯前密密補妝，見到有小鮮肉拎埋一堆零食探班，表現得心花怒放。
提起外母唔少人即刻會諗起盧苑茵，第一次見女兒男友就關心對方住邊區有無樓嘅勢利外母。呢次家燕姐喺戲中飾演黎諾懿外母，當中亦有唔少大鬥法情節。家燕姐顯得好深感受：「出年我就做人奶奶(兒子結婚，奶奶同外母嘅身份好似差唔多，所以我喺戲入面學左好多，特別係拍攝我女兒結婚的一場戲，當時覺得好感人，點知前夫突然出現，搞到我不禁諗，我真人娶新抱嗰日，我前夫會唔會突然出現呢？」
《燦爛的外母》嫁女一幕令家燕姐感觸良多。(資料圖片)
家燕姐教Alex跳Salsa。(影片截圖)
傾完計就到戲肉啦，早就著住鮮艷跳舞衫嘅家燕姐，起身教Alex跳Salsa舞，家燕姐話跳呢隻舞嘅秘訣就係「最緊要其實係擰條腰」，見佢地不停扭腰加轉身，真係完全唔覺家燕姐今年已經67歲，果真係寶刀未老﹗下年係家燕姐入行60周年，之前佢已經放過聲氣想去紅館開騷慶祝，如果開得成氣氛一定好歡欣啦﹗
家燕姐教Alex最緊要擰腰。(影片截圖)