無綫小花林伊麗4個月3度入院:醫生話要即刻做手術

撰文:
最後更新日期:

4個月入3次急症?曾經拍攝《三日兩夜》,有「翻版張鈞甯」之稱的無綫娛樂新聞台主播Michelle林伊麗,3月同圈外金融才俊拉埋天窗成為幸福人妻,怎知原來這4個月以來都受病痛折磨,Michelle在16號Facebook留言透露已經第3次入院,更加要即刻做手術。她接受《香港01》訪問時表示:「醫生話唔太正常,要即刻做手術。」

4個月入3次急症真係好慘。(林伊麗Facebook)

仲要即刻做手術添。(林伊麗Facebook)

Michelle 16號早上於Facebook留言「The Third Time....Can it be the Last Time。(第3次了,可以是最後一次嗎)」上載兩張瞓喺病床狀甚痛苦嘅相,右手插針疑似吊鹽水,幾小時後更表示要準備做手術,手術後Michelle接受《香港01》訪問,透露病情:「從今年4月開始,經常半夜胃痛痛醒要入急症打止痛針,有照過胃鏡又無特別問題,只知係急性胃炎。啱啱星期二(15號)晚收工返到屋企,突然個胃又痛得好緊要,即刻要再入急症,醫生話我實在痛得太多次,而且太頻密唔多正常,幫我check晒全個腹腔,先至發現原來係盲腸炎,要即刻切除,凌晨入院,同日下晝即刻入手術室切除盲腸。」

Michelle曾到內蒙古拍攝《三日兩夜》。(影片截圖)

盲腸炎雖然好普遍,但唔盡快處理好易引起併發症,Michelle都話無諗過咁大件事:「其實真係好痛,不過一直以為只係個胃嘅問題,做完手術醫生話要瞓多兩晚觀察怕有併發症,如果無咩大問題就可以出院。(做手術怕不怕留有疤痕以後著比堅尼唔靚?)今次做微創手術,醫生都話搵啲可以遮到嘅地方落刀,希望唔影響工作啦。」Michelle指手上劇集已經拍攝完畢,工作上暫時未受影響。

Michelle曾專訪名媛Paris Hilton。(林伊麗Facebook)

今年3月Michelle於峇里榮陞人妻。(林依麗Facebook)

其實Michelle今年剛剛成為人妻,3月喺峇里舉行婚禮,7月再喺香港補擺婚宴,老公見到身邊人病咗一定好心痛,她說:「幾次痛到入急症,老公有一直陪住喺身邊,尋日做手術佢都一直喺度支持,呢排辛苦佢啦﹗」

7月份香港補辦婚宴獲Bob任司儀。(林伊麗Facebook)

+2


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。