【爸爸去哪兒】陳小春真人騷帶4歲仔出鏡 重金禮聘餅印仔曝光
撰文：洪曉璇
出版：更新：
陳小春同應采兒2010年結婚，2013年囝囝Jasper出世後，不時上載一家三口溫馨生活照，不過一直都遮住Jasper個樣唔俾佢曝光。呢日小春一反常態上載囝囝喺車上瞓覺嘅正面相，唔單止係相，小春原來仲接左大陸親子真人騷節目《爸爸去哪兒》，節目肯定好落力去打動小春啦﹗
陳小春首次上載Jasper正面照。(陳小春微博)
自2013年湖南衛視從南韓MBC電視台引進親子戶外真人騷《爸爸去哪兒》，曾經邀請林志穎、吳鎮宇、劉燁等父子檔參與演出，締造出超高收視，廣告收入數以憶元計，雖然去年內地廣電總局發出《關於進一步加強電視上星綜合頻道節目管理的通知》文件，包括禁止炒作包裝明星子女等條文，令《爸爸去哪兒》第四季改以於網上播放。
《爸爸去哪兒》紅到曾經拍成電影版。(網上圖片)
陳小春父子到正在福建平潭拍攝。(網上圖片)
嚟到第五季成功打動陳小春俾囝囝曝光。已經四歲嘅Jasper原來同小春餅印一樣，呢日喺福建平潭正式錄影，從網民上載嘅相片睇到，小春同Jasper都戴上CAP帽，冒住大太陽上陣，Jasper個樣同小春真係似到十足十，難得父子檔開工，又或者怕囝囝唔太習慣面對鏡頭，喺拍攝現場小春對囝囝都照顧有加，不時為囝囝遮擋太陽。為左宣傳節目，小春仲第一次放Jasper正面相到微博，相片Jasper喺車上瞓著左，非常可愛，網友都驚呼小春基因強大，更一度成為微博熱門搜尋排第一位。
小春與Jasper穿上父子裝齊齊戴cap帽。(網上圖片)
吳尊一拖二參演。(網上圖片)
除左小春父子，呢次仲有劉畊宏、杜江、鄧倫，不得不提係吳尊再次參與拍攝，今次仲一拖二，帶住囡囡NeiNei同囝囝Max一齊參與演出。不過就有網友提起2014年，吳尊同NeiNei已經曾經參加拍攝，當中吳尊幫囡囡沖涼，播出時電視台無幫NeiNei重要部位打格，引發了唔少爭議，希望呢次唔會再發生同類事件。
+2