【東張西望】摺凳OUT喇！ 指尖陀螺竟然係十大殺傷力武器之首

中國有十大武器，以摺凳為首，走到山窮水盡之時，就要使出終極大武器：「攞你命三千」！不過隨着時代遷移，武器史都要與時並進。剛巧早前TVB資訊節目《東張西望》就公布美國消費者監督組織公布「夏季十大危險玩具名單」，這些玩具潛在危險程度，輕則入肉，重則就冇命，最重要是這些武器的輕巧程度，比摺凳更容易呼之則來，揮之則去。簡直可以改寫中國武器史。

古有豬肉刀、殺蟲水，今有玩具刀、高壓水槍。節目裏，學者就示範高空掉刀，看看能否直插西瓜，結果當然毫不意外，實插得中喇……只是日常不會用玩具刀劈西瓜而已，見到最多避之則吉囉；另一方面，眼見夏日熱辣辣，有不少人最愛玩水槍，所以《東張西望》就用高壓水槍，測試它的殺傷程度，程度大到……就是連厚畫紙都射得穿呀！實驗證明，高壓水槍最適宜用來隔山打牛，水戰都可以玩到游撃戰咁款。

不過，當今十大武器之首你實估唔到，竟然是聲稱有減壓功能，望住佢轉就有治癒功能的指尖陀螺，價值不過20元。開心轉，唔開心又轉，愈轉愈受歡迎，生產商也愈出愈多花款，由普通的三個圓形，轉化成夜光、飛鏢型都有！拿在手上，有如火影忍者。而節目裏，學者就以高速摩打示範指尖陀螺的殺傷力，目標就是外皮吹彈可破的蕃茄，確實劃出一條深深痕迹。不過，指尖陀螺能夠由業餘轉到專業級數，睇怕轉到手指到靡爛都唔掂。所以《東張西望》如此測試，是否代表有隱世高手，轉到勁過無敵風火輪先？係就要留名睇睇喇。