戴耀明照顧媽咪拒北漂 御用傻仔最緊張母親:佢想等到我攞獎

撰文:
最後更新日期:

戴耀明現忙拍無綫劇《果欄中的江湖大嫂》,劇中和陳煒及黃浩然等,有不少對手戲。

戴耀明在亞視、無綫捱足25年,終於在內地發圍,在愛奇藝拍電影、電視劇,收入亦好過無綫幾倍,不少網友都為排長上位而高興,但人們不禁要問,既然在國內吃得開,為何還要留在無綫呢?除了因為戴耀明視無綫為娘家外,最重要是不捨得79歲媽媽一個人在香港,他說:「自己都諗唔到喺大陸有機會,亦有國內經理人話不如簽俾佢,留喺大陸長期發展啦,但我最後都冇,因為都想多啲時間陪阿媽,試過有次喺大陸拍緊嘢,我女朋友話我聽「你阿媽疴血喎!」我即刻打俾佢,佢仲話冇嘢喎,好小事,我話阿媽疴血都真係唔小事喎,佢好怕阻到我返工,仲叫我唔好落返香港,我梗係落返嚟啦,雖然嗰次係腸胃敏感啫,但嗰次我就喺到諗,如果真係簽上面,真係成年喺大陸,得返新年一兩個星期先落返嚟喎,咁阿媽點呢?諗過都係繼續喺無綫,有啲十幾日上大陸嘅工作就接囉。」

20歲戴耀明在亞視入行,讀完亞視訓練班,即拍《李小龍傳》男主角吳大維。

戴耀明這麼緊張媽媽,因為當日是她叫戴耀明報讀亞視藝員訓練班,他說:「當日喺阿媽睇到亞視藝員訓練班廣告,叫我入讀住先啦,無綫都未收人,佢由最初到而家都好支持我,佢同我講過㗎「雖然唔係大紅大紫,又唔係賺好多錢,但最緊要你開心,而家有人揾你返大陸仲好啦,當有人俾錢你去玩囉,」哈哈,老人家好得意㗎,仲記得亞視訓練班出嚟,即刻拍戚其義監製嘅《李小龍》,吳大維做男主角,我同張家輝做佢朋友,仲飛去加拿大拍,我人生第一次搭飛機。」

戴耀明在愛奇藝發展不錯,在劇集《明朝刺客》飾演要角,海報亦有份出現。

戴耀明在無綫多演諧角,但戴媽媽一直很支持他,每次看無綫劇集,都期待看到兒子的演出,他說:「我阿媽喺電視見到我會即刻打嚟㗎,喂,又見到你喎,幾好呀,幾攪笑,但當見我做啲壞人呢,佢就話嗰啲唔好呀,教壞人呀,佢太入戲喇,哈哈,有時佢話希望自己長命百歲啦,等你攞獎,返到屋企都有人恭喜下你嘛,唉,都知達成呢個心願好渺茫,佢成日講埋呢啲笑嘅,又好擔心我,未成家立室....」戴耀明當然明白無綫遊戲規則,但亦知媽媽出於一片關心,所以他對媽媽說了一個多年的「大話」,他說:「我同佢講攞咗獎嗰啲好忙㗎,如果我攞咗,邊有時間陪妳呀?唔攞獎仲好呀,揾錢實際啲,我每年都同佢講,出年俾個孫你代替個獎啦,但我呃咗佢好多年..都整唔到個孫俾佢。」

拍攝《鐡馬尋橋》期間,戴耀明爸爸身患重病,有幾場戲他更忍不住落淚。

戴耀明最為人熟悉的角色一定是《鐡馬尋橋》的排長,到現在網友說起這名字都自然想起他,但其實拍攝《鐡》劇時,是他的人生最低潮,他說:「嗰陣應該係拍《鐡馬尋橋》,爸爸亦係身體最差嘅時間,醫生都話佢...唔會捱得好耐喇,有一場戲講我被師傅King sir鬧我冇鬼用,生嚿叉燒好過生你,嗰場明明唔駛喊㗎,但我唔知點解忍唔住喊出嚟,但導演又拍咗喎,咁出咗街之後都有啲反應啦,咁就係大家成日講嘅排長喇,老豆都支持我嘅,但就冇阿媽咁出面啦,始終老豆傳統啲,感情就收得埋少少,但做仔係知嘅。爸爸走咗之後,我情緒好低落,覺得人生好多嘢都好快走呀,嗰陣有少少抑鬱,我有睇心理醫生,好彩唔駛食葯。亦唔好話有咩低潮,因為我一直都冇高潮過,哈哈,而家最緊張媽媽啦,佢係我永遠第一個分享嘅人,」

+6
+5
+4


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。