【天鴿風球】睇片真係好驚 岑詠辰：朋友屋企道牆出現裂痕﹗
撰文：洪曉璇
出版：更新：
相隔五年香港再次掛起十號風球，呢隻天鴿嘅威力真係非常強勁，澳門全市大停電，香港各處亦出現驚險場面，棚架倒塌、低窪地區水浸、更有吊船被吹至吊吊揈擊爆住宅窗戶。大部分人都留在安全地方暫避，不過留於家中一樣感受到颱風威力。原名岑潔儀的岑詠辰於IG上載短片，可以見到圍欄及盆栽被吹倒，Zoey接受香港01訪問時話：「風力真係好誇張，朋友屋企道牆仲出現裂痕﹗」
Zoey上載一條於家中拍攝嘅短片，風聲大得嚇人，留言話：「真的要紀錄一下十号風球的天鴿，真的好恐怖，把我家室外的物品全摧毀，我還感到整棟樓在搖動.....太誇張了，大家出外要小心，盡量不要出外吧」其後佢接受香港01訪問：「屋企喺將軍澳區，可能東面比較當風，全晚都聽到好嘈嘅風雨聲，仲FEEL到屋企搖搖下，囝囝都嚇到喊左好耐呀。今朝見到露台吹到滿目瘡痍，可以拎入室內嘅都盡量拎晒，不過出面有個篷吹到冧左，好得人驚。」
FACEBOOK、WHATSAPP Group瘋傳各區喺風災下嘅情況，Zoey都話睇到心驚膽跳：「睇到嗰條吊船撞爆窗嘅片真係好誇張，好在家人同朋友大部分都無事，不過有朋友屋企道牆出現裂痕﹗佢仲話唔知留喺屋企定應該離開先啱。」
除左岑潔儀之外，關心妍亦有上載短片，話感受到屋企好似正在搖晃，而陳煒就上載一張相，相片中有兩個盆栽疑似被吹倒，並留言話「10號風球下的一天，瞓住覺等落波，再等通知幾點返工」。
陳煒因颱風意外得到一日假期。(陳煒微博)