【天鴿風球】張智霖袁詠儀風雨同路買外賣 落車搬阻路斷樹兼報警

撰文:張嘉敏
出版:更新:
與靚靚都素顏上陣,Chilam一臉鬚根,被看直播的粉絲讚好man。(網上截圖)

張智霖(Chilam)同袁詠儀(靚靚)出名是圈中的模範夫婦,今日天鴿襲港打十號風球兩公婆就風雨同路拍住拖出街買外賣,回程返家時還於facebook上做直播。兩人更加是素顏上陣,就似隔籬屋個街坊咁,非常之有親切感。鏡頭一開影住車窗外落住雨的公路,之後鏡頭一轉就影住Chilam喇,Chilam滿臉鬚根並戴着眼鏡,靚仔得來又Man爆,他舉起V字手勢跟大家打完招呼後表示:「我哋已經完成咗外賣嘅任務,咁就返緊屋企。沿途係好狼籍,的而且確係好多樹,大家睇下,好似障礙賽一樣。」

靚靚祝大家一切順利。(網上截圖)

靚靚就影住路面情況,確是見到左右兩邊都有很多樹折斷了跌在路旁,Chilam則呼籲大家在十號風球懸掛的期間千萬別要出街。靚靚就補充表示:「我哋都好快咁返屋企喇,大家唔需要擔心,我哋會注意安全。希望大家今日一切順利啦。」Chilam亦叫大家不用擔心,臨尾還扮交通新聞報道說:「最新消息。」又問靚靚要否直播到回到家為止,靚靚表示不用。之後Chilam騷多次個靚仔樣加燦爛笑容同大家講拜拜,靚靚亦繼續夫唱婦隨,影一影自己個樣再同大家say goodbye。網民都大叫他們要小心,又讚Chilam有型,兼大讚兩夫妻恩愛。阿Bob(林盛斌)就回應表示:架G花晒,重點放了在Chilam的靚車度。據知Chilam在駕車返家途中曾一度因斷樹阻住去路,而落車搬樹,還報了警。他表示:「都應該嘅,不要阻住其他人嘛。」總之安全返家就放心晒喇。