【權力遊戲．劇透慎入】第七季大結局　3大爆點睇到嘩嘩聲

注意：嚴重劇透﹗
《權力遊戲》第七季最後一集《The Dragon and the Wolf》終於播完，作為承接下季最終季前的一集，劇情當然要咁爆得咁爆，今集可謂總結三個要點，1.三大家族結盟 2.重要奸角死亡 3.驚天愛情線終極誕生。
奉勸咁多位，未睇嘅，立即離開，切勿觀看下文。

三大勢力結盟

承上集Jon Snow大敗於Night King以及White Walkers軍團，又犧牲埋龍仔Viserion，龍母終於見識到呢班喪屍威力，於是乎一群人就走到King’s Landing，打算跟女皇Cersei Lannister和談，協商暫時停戰，共同抗敵，呢幕大和解作為粉絲相當興奮，有幾多機會見到全劇咁多對仇人呀、昔日戰友呀一齊出場，Cersei跟Tyrion Lannister、The Hound跟The Mountain、Euron Greyjoy跟Theon Greyjoy兩叔姪等，絕對是個世紀會面，不過大家都知要說服Cersei邊有咁容易，於是乎放生隻喪屍出嚟嚇吓對家，Jon Snow更即場來個「打喪屍」教學，Euron更嚇到立即話要班師回島，而Cersei原本都決定停戰，不過一向帶住赤子之心的Jon Snow斷言拒絕Cersei開出的條件，查實Cersei都只是想你在停戰期間保持中立，點知Jon Snow話自己一早承諾臣服龍母，大家當堂被他的誠實嚇窒（當然龍母內心梗係Sweet到爆啦），和談亦就此宣布作罷，小惡魔Tyrion眼見功敗垂成，決定以身犯險，獨自去找Cersei睇下有無彎可轉，正當觀眾疑惑Tyrion會否就此玩完，Cersei都只是數落下他的罪狀，痛恨他是殺父及殺子仇人，觀人於微的Tyrion發現Cersei又再陀仔，決定動之以情指今次一戰不是純綷的種族之爭，而是關乎人類存亡，Cersei隨之態度軟化，仲好順攤咁應承返一齊出戰。實情又點呢？話說Cersei其後見到Jamie認真計劃如何派兵北上時，Cersei就講出她背後陰謀，原來只是口頭應承，絕不會派兵出戰，更已安排好Euron出走去埃索斯，重金禮聘黃金傭兵團，決定趁住狼族龍族攻打喪屍之時，就收復土地一統天下，Jamie聽後嬲到爆，指自己不會背棄承諾，更指Cersei夠膽就殺死埋自己，如此重義重情，難怪今季之後，Jamie一躍成為劇迷最喜愛角色之一。

重要奸角死亡

今季另一大家關心，就是Arya跟Sansa的姊妹䦧牆，正當擔心她們會否被Littlefinger成功唆擺，幸好還有擁有烏鴉之眼的細佬Bran，三姊弟夾計引Littlefinger入局，Sansa以臨冬城城主身份公審Littlefinger，指他背叛狼族，又陷害其家父Ned Stark，離間完她母親跟萊莎阿姨，又離間她們兩姊妹，分明挑起家族內鬥，漁人得利，粉絲睇到Sansa數落Littlefinger罪狀簡直大快人心，最後Arya更以Littlefinger的匕首殺死對方，演繹何謂「自作孽，不可活」。

姑姪戀終極育成

自從Jon Snow去到龍島找龍母後，兩人就日日眉來眼去，加上大和談中，Jon Snow型爆拒絕Cersei條件，當住眾人話自己臣服龍母，令二人關係更加浮面，龍母之後亦都聽從Jon Snow意見，棄選騎住飛龍出征，而是跟Jon Snow齊齊坐船去北境，始終坐船時間較長，又容易暈船浪，夜晚更係無嘢好做，而Jon Snow跟龍母亦都再禁不住愛火，終於在船上發生關係，終極亂倫﹗Jon Snow的八月十五更清楚入鏡，認真火辣。今集較為特別就是Bran利用其烏鴉之眼回到過去，再次引証龍母哥哥Rhaegar Targaryen跟Lyanna Stark有結婚，Jon絕對不是Ned Stark私生子，而是真正皇座的繼承人，Jon跟龍母這種不倫關係正是一段姑姪戀﹗

喪屍版Viserion 現身

除了以上三大要點，結局當然不少得有場精彩武戲啦，Night King以及White Walkers軍團正式殺到去北境長城，Night King更騎住喪屍版的Viserion現身，Viserion一噴藍火，長城即燒開個大洞，成班守夜人全軍覆沒，White Walkers十萬大軍隨即入城，看來下季最終會，會是看各個家族如何聯手對抗Night King兵團，不過人哋有龍有喪屍，殺死對家又可即刻復活變喪屍，咁玩法，邊有得鬥？