【燦爛的外母】同薛家燕玩3P好驚嚇 黎諾懿：嚟緊同佢有好多床戲
撰文：洪曉璇
出版：更新：
之前《超時空男臣》膠到盡頭反而真係笑點百出，瘋狂喜劇甚得網民歡心。接棒嘅《燦爛的外母》由薛家燕、黎諾懿、湯洛雯等主演，有家燕姐坐陣都知道又係輕鬆喜劇，第一集唔知係咪想「先聲奪人」，居然上演家燕姐同黎諾懿嘅床上戲，仲要動作連場，真係好重口味呀﹗黎諾懿接受香港01訪問時話：「嚟緊同家燕姐仲有好多場床上戲！」
拎住個榴槤去捉姦係特別嘅。
劇情講述薛家燕飾演一家傳統豆品廠總管，工作期間得知老闆私會小三甄詠珊，與飾演其姑仔嘅林漪淇上門捉姦，點知入門口揭開張被，裏面嘅竟然係戴住眼罩，身穿SM服飾嘅黎諾懿，佢仲扮講唔純正廣東話，「邀請」家燕姐一齊玩，將家燕姐逼到上床大嗌「唔好強姦我﹗」場面爆笑。
呢條褲真係短到呢......(影片截圖)
呢場床上戲播出後網民表示非常爆笑，但亦有網友表示場面有點難以接受，黎諾懿接受《香港01》訪問時話：「著嗰套衫已經好好笑，播出時我仲走光，條褲穿咗崩見到條under，因為條褲真係短到呢，個設計只俾你遮重要部位，家燕姐拍嗰陣都笑場笑咗好耐。件衫真係好貼身，不過自己無特別操練，囝囝出世後無咩時間，無做仔嗰陣咁fit，都仲見得下人嘅。」
呢張相重點除咗係家燕姐嘅台詞，其實仲有黎諾懿走光。(影片截圖)
明明呢套戲入面黎諾懿同湯洛雯先係一對，點知一開始就先同未來外母上演床戲，實在令人始料不及：「家燕姐話呢場床戲係佢30年嚟第一次，之後同佢仲有好多場床上對手戲，比起同戲中老婆湯洛雯仲要多。因為劇情話家燕姐想抱孫，係咁催我地生BB，仲懷疑我性能力，又煲中藥鋪蓮子喺床上，總知就笑料百出。」好在現實生活中，黎諾懿已經有個得意囝囝小春雞，唔怕俾人懷疑佢「人生如戲」。