【燦爛的外母】湯洛雯有主角做 靚湯多人識:唔再叫我乜乜個姪女

撰文:
最後更新日期:

對比之前思思嘅角色,今次靚湯個造型成熟咗唔少。

極速做完後期趕住播的《燦爛的外母》昨晚(29日)正式出街,第一集就有家燕姐與黎諾懿的床上戲,有觀眾話好搞笑,都有人話重口味。不過,劇集還有其他值得睇的地方,就是靚女湯洛雯。她在劇中飾演家燕姐個女、黎諾懿的青梅竹馬,之後仲同對方有感情線。雖然她在首集中後段才出場,但有網民大讚她越來越靚,更為她做女主角感到高興;加上她每次在Big Big Channel開Live都有過萬人睇,看來她的觀眾緣非常好。

好多人都話靚湯越來越靚女~

首先回顧一下靚湯的演藝生涯,佢2012年參加香港小姐,當年係大熱門嚟㗎!雖然最後不敵黃心穎同朱千雪,但都有齊齊加入TVB。入行冇耐就有處境劇《愛·回家》拍,做「思思」一角,佢個清純鄰家女孩Look成功入屋,已經有唔少網民讚佢好靚,做得好好。之後佢就同一眾上位花旦李佳芯、黃心穎、麥美恩等等做綜藝節目《學是學非》,成為「是非精」都儲到一班fans。不過,縱觀嚟睇,靚湯未必好似其他女演員咁,有咁多機會、咁快做女一。相比之下,今次《燦爛的外母》擔任女主角,呢個機會真係等咗好耐。靚湯早前接受《香港01》專訪時都有講過:「每個人都會有快慢,都冇話羨慕邊個。而家就…我touchwood先,覺得自己so far發展得幾好喎!所以做唔做到女主角都話唔埋嘅,做好自己重要啲!」

+10
+9
+8

網民講起靚湯,有好熱烈嘅討論。除咗話佢真係好靚之外,都會提起:「佢係無綫五虎之一湯鎮業嘅姪女!」聽到有親戚都係做演員,自然就會聯想到有護蔭,不過都有網民突破盲腸,表示:「如果佢係靠叔叔上位,一早做咗女主角喇!」言下之意,都相信靚湯係靠自己,先至有今日嘅機會!佢都回應過呢個話題,最初都有試過唔開心:「其實呢個問題幾年前開始有,初時會有唔開心。因為出街都係叫我邊個邊個姪女,我都會好擔心會唔會一直都畀人咁叫呢?但最近好得意地,好似多咗人叫得出我個名,唔係叫我乜乜姪女,唔係叫我是非精,多咗人知道我係邊個,所以而家都唔會特別介意叫我做其他稱號,我最想就係有人記得。」而家佢做到喇!



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。