【奇妙電視】自家劇《閃婚100天》首播冇人知 無重溫真係好脫節
喺香港要睇電視劇，來來去去都係TVB，ViuTV出產嘅《瑪嘉烈與大衛》系列雖然評價不俗，可惜Viu劇集產量唔多。奇妙電視5月正式開台，大家記得嘅節目，來來去去都係《杜汶澤食住上》，新台宣傳力度的確有點弱，弱到連第一套自家劇集《閃婚100天》已經首播，坊間都好似唔太多人知道呢件事……
呢套戲由廖亦崟(威廉)、鄭融、吳耀漢、吳嘉龍、鄒文正、李敏領銜主演，一共只有10集，每集大約一小時，係奇妙電視第一部自家製作的電視劇集，亦係《100天系列》第一輯。戲中鄭融飾演嘅自由身女插畫師黎海兒，遇上威廉飾演嘅阮彥廷然後閃婚，新婚生活過左甜蜜期後，二人開始發覺性格、習慣樣樣都南轅北轍，簡單d嚟講，有d似台劇愛情小品。
9月4號晚播第一集，節奏明快，好多時運用自然光拍攝，睇落幾舒服，演員配搭幾新鮮，原來鄭融入行十四年，但擔正拍劇都係第一次，孖住來自台灣嘅Lollipop@F成員威廉飾演一對，而鄒文正、李敏分別飾演佢地兩個嘅好友。主角住嘅地方又唔會大得離地，小巧精緻，似返真正香港人住緊嘅窩居。
播出後上網睇番，評論唔算多，但大多以正評為主，有人話鄭融獻唱嘅主題曲<I’ll be with you>好好聽，終於唔使下下得鄭俊弘、吳若希、Hana；亦有人話「睇厭香港演員，希望威廉好像其他台劇男星一樣給香港觀眾新鮮感。」。其實講來講去，都係睇TVB睇到悶，觀眾想有點新鮮感。
不過有個非常致命嘅弱點，來到2017年嘅今日，節目居然完全無安排網上或APPS可以重溫，劇集喺晚上8點30分播出，重溫時間係凌晨3點半，試問今時今日有幾多香港人，可以喺呢兩段時間坐定定睇播出呢。上埋官網睇睇，《閃婚100天》介紹，就係得咁多，相就得一張，加埋首主題歌，無啦，介紹下邊個演員飾演咩角色都好呀……真心地，想支持下都不禁卻步啦……
暫時無網上無APPS可以睇番套劇，唯有睇住Making of先啦……