【壹號皇庭】深宵劇場最終決定 鄭秀文王菲25年前好青澀
當TVB劇集收視唔理想都可以被腰斬/調時段，講左播但未播，最後被抽起都真係無佢符嘅。講緊係宜家唔少人追看嘅凌晨時段，《天地豪情》最後兩集，但接捧嘅戲一改再改，由一開始傳會播《天地男兒》，出節目表時話係《鑑證實錄》，點知出埋節目表都仲未改完，最新又話播《壹號皇庭》，究竟調完未架？TVB外事部已回覆，今次堅嘅﹗
之前《三生三世十里桃花》，話播又唔播改足幾次，今次就輪到凌晨時段啦。早幾日出左9月7日節目表，寫住下午11:55播《鑑證實錄》第一集，轉個頭又發現節目表同時段變左做《壹號皇庭》，令一眾男兒迷同鑑證迷表示勁失望，亦令大家非常懷疑，到底今次係咪真架呢？
TVB外事部回覆香港01查詢時表示：「電視台節目調動乃正常現象，繼《天地豪情》於九月六日大結局後，翡翠台將安排播映《壹號皇庭》系列劇集，九月七日先播13集《壹號皇庭》，九月二十日（星期三）則播映《壹號皇庭II》。」好啦，官方回覆，播完第一輯播第二輯，大家可以慢慢煲啦。
講番《壹號皇庭》，同系列五輯劇集，第一輯於1992年播出，咁就已經過左25年，主演嘅藝人粒粒皆星，故事以歐陽震華(余在春)、陶大宇(江承宇)、蘇永康(周志輝)、蔣志光(周少聰)及駱應鈞(周文彬)等人為主，女角方面，陳秀雯(丁柔)、鄭秀文(方家琪)、劉美娟(江承宙)、第二輯的王菲(唐毓文)等等。
七八十後對律師嘅印象，大都來自呢套劇集，工作時雄辯滔滔，放工後落pub食花生摸酒杯底，唔少律師朋友都話，呢套戲嘅影響力極大，到宜家大眾都以為佢地做律師真係咁樣樣。同時亦開創以專業人士作題材嘅劇集先河，之後嘅《妙手仁心》系列仲有《刑事偵緝檔案》系列等，都係由此而起。
單係搵到sammi同王菲兩大天后參演，已經係前無古人後無來者，絕對係可一不可再嘅陣容。雖然sammi同阿菲分別喺第一輯同第二輯出現，不過有個共通點，就係先後喺劇中做阿輝（蘇永康飾演）嘅女朋友。當年嘅Sammi仲係包包面，而阿菲就仲係長頭髮，實在係令人懷念呀……
除左劇情以及演員吸引，呢套劇嘅主題曲及插曲都極非常用心，主題曲起用英國Dire Straits嘅「Your Latest Trick」色士風獨奏，我咁寫包單，呢隻歌一響起，煲劇回憶即刻返晒嚟。不過近期無綫重播興改晒d配樂同歌曲，呢隻經典歌保唔保留到都仲要等播出先知，宜家即時俾大家重溫一下：