澳門小姐麥嘉欣夠主動:激嬲男友我會氹返佢

撰文:
最後更新日期:

上個星期日被網友瘋狂滾動式洗版嘅2017年國際小姐嘅澳門代表麥嘉欣(Sofia paiva),今日就特別到香港與港區代表王詠珩(Wing)一齊接受《香港01》專訪,提到Sofia與藝人男友沈柏彤經常在Instagram放閃,樣靚又後生被指係完美女友嘅Sofia,現場所見真係一位名符其實嘅「又pure又true」嘅女仔,「我係愛情中入面係開心果,我好鍾意笑仲好容易笑到收唔到聲,就算佢好靜嗰陣我都係旁邊煩下佢咁。」

攝影:黃國立

場地:Kiz Royal

上星期被網友瘋狂洗版嘅麥嘉欣(Sofia),今日就到香港接受訪問。

講到經常在Instagram與男友沈柏彤上載放閃照,Sofia聞言後笑說,「其實放咩相都係順其自然,因為近期工作都比較多,我都有放返工作嘅相!」提到男友,麥嘉欣(Sofia)嘅面上即刻露出好sweet嘅表情,究竟係點樣先可以同咁完美嘅女友拍拖呢?Sofia透露因為哥哥嘅關係而認識男友,「因為哥哥同佢一齊參加歌唱比賽,我都有去支持哥哥,所以咁就認識。」

+4
+3
+2

Sofia話鍾意有上進心同責任心嘅男仔,相信藝人男友沈柏彤完全符合條件。

與男友沈柏彤拍拖一年嘅Sofia透露與對方都好少嗌交,「當然有些時候佢可能會好遲覆我msg,我會有啲埋怨會煩下佢咁,但佢都OK嘅。但有時真係激動嬲佢嘅話,我會整D得意同搞笑嘅表情黎氹佢開心!」咁到底Sofia真正理想型男友係點呢?她說,「我鍾意有上進心同責任心嘅男仔,sweet得黎但只能夠係對住我,唔係對所有女仔都sweet。我覺得最重要係個人要夠定,唔好玩玩下咁。」咁係咪認定對方係結婚對象?Sofia笑言,「我都仲好後生架嘛,順其自然喇。」

Sofia話自己好鍾意笑,仲一笑就笑到收唔到聲。

相信唔少女仔小時候都曾經幻想過長大後參加選美,Sofia會參加選美嘅原因有部分係受同樣曾參加過選美比賽媽咪同姑姐嘅影響,「佢有同我講過訓練經歷係會好開心,daddy都想我參加嘅話可以試下唔同嘅嘢,出去見識下。但佢地知道我份人好細膽,所以都無話特別要我去參加選美比賽。我最想多謝我哥哥,因為今次係佢幫我踏出呢一步同屋企人講:(不如俾佢參加下喇!)。」Sofia咁講都算係出自選美世家,當然要親身俾tips喇,「佢地有教我點樣談吐方面,點樣答問題都有提點我。」她透露覺得自己參加比賽後,最大轉變就係夠淡定,「以前我嗰人真係好慌,好容易就會話點算呢,點算呢。嗰d驚係會搞到你更加唔好。但而家嗰人就會比較鎮定啲,雖然都系有啲慌。」

Sofia表示修讀心理學,希望可以幫到人。

現於聖若瑟大學修讀心理學二年級嘅Sofia,她透露身邊嘅同學都好支持自己參選,「佢地真係好好全部都對我好好,無咩負面嘅評論。反而會串下我,『你出名喇,無朋友做喇!』但我地依然係好朋友同同學仔。」其後她亦透露當初選擇心理學嘅原因,「小時候認識嘅職業都係醫生,護士,空姐呀咁。我尤其是覺得做護士好好,又可以幫到人。但大嗰之後先知做護士好難,同埋我有啲驚。所以先會揀另一個可以幫到人嘅職業,就係讀心理學。」咁怕唔怕將來嘅發展會兼顧唔到學業?Sofia指,「一定會比之前辛苦嘅,同埋我嗰科都算係較吃力,雖然無話唔得嘅,可能之後連食飯時間都要睇下書咁。」

仲有2個月,Sofia就要到日本東京代表澳門參加國際小姐,佢就話好怕抵抗唔到日本嘅美食, Sofia笑言知道自己有baby fat,去到日本一定忍口會努力keep fit,「因為我好鍾意食嘢,以前係可以日日都食雪糕,而家就會『嗯,得喇唔洗喇。』同埋見到其他地區嘅佳麗都食少少,自己見到都會食少啲。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。