【嫁到這世界邊端】港女不顧一切嫁到泰國　唔住太古城進駐翟道翟

泰國是很多香港人喜歡去的地方，甚至有人形容是港人的第二個鄉下，不過如果要你定居喺泰國你又頂唔頂得順呢？昨晚播出的無綫節目《嫁到這世界邊端》就講港女Judy為愛嫁到泰國，甘願放棄香港的舒適生活和工作，原本家住太古城，任職OL的她嫁雞隨雞跟泰國丈夫在曼谷生活，兩口子在當地著名市集翟道翟內經營精品店，即使環境熱如蒸籠，仲要無冷氣，Judy亦甘願為愛捱苦，直言：「我嚟咗泰國之後身體好似差了些，都有些頂唔順，但頂唔順都要頂落去，所有嘢都耍落手落腳做，成個舖是我同老公兩個搭建出嚟，我對手都傷痕累累，以前好白淨好滑㗎，但係，都要接受㗎，你既然企得喺度就要接受呢度嘅環境，如果唔係無可能喺度生存。」

如果「港女」等同要人照顧、公主病、小姐格、貪慕虛榮、高竇同埋愛享受等等，咁Judy這位港女就完全癲覆了「港女」呢一詞。Judy當初竟然是主動追求她的泰國丈夫Dass，兩人於翟道翟邂逅，Judy即對Dass一見鍾情，返回香港後竟愈來愈掛念Dass，於是就以兩人生日只相隔一周為借口，主動提出飛到曼谷跟Dass一起慶生，為這段姊弟戀勇敢去爭取，就算Dass講明自己無錢，都完全無阻Judy對他的愛。Judy表示：「我話去搵佢，佢話唔好，叫我唔好去搵佢，那該都有少少失望，但係我唔理，直衝，我照去搵佢，唔理咁多。愛情真係要自己爭取㗎！」

身為主持的陳貝兒亦很佩服Judy，不禁問Judy：「你話愛情要自己爭取，但其實講就容易，你會諗個男仔係咪鍾意我先得㗎，我就咁衝出去，跳落山崖會粉身碎骨。」Judy即該話：「我唔理，我係唔會理㗎，如果我心目中係鍾意嘅，我會衝，我會不顧一切，同埋我係唔鍾意畀人追，反而我鍾意嘅人我會自己去追求，一定要開口，要行出第一步，一定要衝，唔衝就咩都無，係咪先？」這段對話亦反映到陳貝兒與Judy對追求愛所持的兩種不同態度。陳貝兒都講出她的心聲：「有邊個女仔唔鍾意做公主，有人服侍，可以舒舒服服吖？」不過她覺得Judy為了真愛也是值得的，幸福其實沒有標準答案，只要自己心裡感到幸福，便是真正的幸福。