【踩過界】朱千雪示範完美女友 尊重男友私隱：唔使佢share位置
全民估完《同盟》邊嗰係Rainman後，今日就連續4晚播《踩過界》結局篇。今晚講盲俠知道Yanice死非常心痛，仲不時回想起她，劇中王浩信、朱千雪浪漫淒美，但現實中朱千雪不會追求電影式的愛情，反而是一個很理性的人，千雪BB今日接受《香港01》訪問，更表示有時喜歡一個人的浪漫，她說：「戲劇永遠比現實浪漫，所以我睇日劇韓劇都係一個人睇，有時你睇完都覺得好sweet呀，但你身邊嗰個未必會覺得，咁我咪好無癮，所以浪漫戲自己睇好啲。」
朱千雪愛一個人睇戲，亦不「黐身」，她透露男友大部分時間都在新加坡工作，每次返香港逗留很短時間，「多數係星期六日返，又唔係個個星期返黎，而且我開始要返學，所以都要就下啲時間。」提到睇戲都係一個與男友聯絡下感情嘅活動，她就笑言，「我同佢睇戲機會真係唔多，都係各有各睇！因為大家都係唔同地方工作，邊有時間夾到呀！就算睇戲我首選都係笑片同superhero電影，反而從來無另一半邀請過自己睇浪漫電影。」千雪BB講完呢句之後，都忍唔住大笑咗一陣！
相隔異地拍拖大部分都係用message聯絡，千雪BB都唔例外，仲話自己性格好急，好多時候都要人即刻秒覆，但對另一半似乎就比較鬆懈，「我對而家啲同學都係咁，但對朋友就唔會，因為唔會有緊急嘅嘢，都係啲無聊嘢。(咁會唔會要另一半share 位置俾你？)我好尊重私隱好驚人干擾我，所以我都會尊重返對方。其實無論係咩關係，就算屋企人同朋友都好都要尊重嘅。」
千雪BB 6月接受《香港01》專訪時其實都有透露過有一位對象了解中，即係而家嗰位Justin，當進行玩愛情心理測驗時講過男友最好係由朋友開始，咁由細識到大嘅Justin嘅條件真係好啱，「鍾意由朋友開始係因為係熟悉嗰個人，我覺得而家所有嘢都係舒服，因為用朋友方法去開始係最好，無壓力呀嘛。」問到現時專注學業同工作嘅佢點樣與在新加坡工作嘅男友維繫感情時，千雪BB就話，「都無嘅，我地各有各忙，而且工作時間都唔會影響大家，所以就無乜衝突，同埋佢都知道我讀書好忙，佢都好明白。」
講到日前千雪BB就被影到與男友溫馨短敍兩小時，她就話要特別澄清並笑指，「佢從來無出現過，佢根本都唔係香港，我睇到之後都覺得好恐怖，仲即刻打俾佢問佢點解返黎香港唔揾我。」對於拍拖一事令不少網友心碎，千雪BB都係嗰句希望大家先專注其工作，亦提到與男友相識經過，「我地好細嗰就已經識，兩邊父母都係好好朋友，同埋我同佢未係好熟嘅時候見到都會say hi。(咁家人都好支持拍拖？)無話支唔支持，咁大嗰人都有空間去選擇自己嘅朋友嘅。」