李亞男Deep V再現 王祖藍唔應機
撰文：鄺鈺瑩
出版：更新：
李亞男從來唔吝惜自己嘅好身材，騷完比上海觀眾睇，返到香港一樣照曬。
李亞男（Leanne）月初在上海出席活動時，一襲Deep V打扮簡直係驚為天人，而佢當時仲講笑咁話：「王祖藍話會休咗我」，言猶在耳，Leanne昨晚在港與林欣彤出席珠寶活動時，又再發力！Deep V加大露背，挑戰人妻性感極限之餘，睇怕都挑戰緊老公底線。「我同服裝師揀呢件衫係想配合活動主題嘅，因為呢個V字長裙可以突出珠寶嘅高貴。我又唔係次次都要性感示人，只係撞啱呢兩個活動都係咁啫，我最想件事出嚟係靚嘅。我有send相畀老公睇，但可能佢太忙未有時間覆我啦，但我相信佢會覺得靚嘅。」
李亞男於活動上大開金口，不過佢就話有少少緊張。
談到平時選購首飾，Leanne表示價錢不是重點，反而着重款式是否得體，而她人生中收過最珍貴嘅兩件首飾都係由老公所送：「第一件係拍拖時佢第一次送我嘅十字架頸鏈，第二件就係求婚戒指，係心形鑽石，我非常唔捨得戴，只有隆重場合先會拎出嚟戴。」
林欣彤雖然有小v，但就顯得有點平凡。
在活動現場大展歌喉的Leanne，笑言雖然喜歡唱歌，但由於唔係經常有機會練習，所以都有啲緊張，更透露唱完之後有問林欣彤意見。欣彤則大讚老闆娘人靚歌甜：「我覺得Leanne唱得好淡定、好甜，加上佢又靚又高、同埋件衫同首飾都靚，所以真係好靚好靚好靚。」欣彤又指自己收過最有意義的首飾，均是由母親所贈，而且三樣都是頸鏈：「我最鍾意嗰條，係有一粒圓形鑽石仔嘅，好簡單。媽咪好鍾意送頸鏈畀我，因為好貼身，可以成日陪住我，所以我好多時都會戴住佢送畀我嘅頸鏈。」