【爸爸去哪兒】吳尊老婆首現幕前 一家四口互動勁溫馨

撰文:
最後更新日期:

中國傳統社會係男主外女主內,結婚後太太照顧家庭照顧小朋友就似理所當然,但現今社會講男女平等,或者正因為咁,內地綜藝節目《爸爸去那兒》長拍長有,令一眾平日Man爆男藝人展露慈父一面。來到第五季吳尊再次參與節目,除左帶住囡囡NeiNei以及囝囝Max挑戰不同任務,吳尊太太林麗瑩亦首次於螢幕前曝光﹗

吳太一次抱起兩個小朋友,少D臂力都做唔到呀。(影片截圖)

最新播出嘅一集,去到汶萊吳尊大宅拍攝,吳尊準備帶NeiNei以及Max出發到機場,小朋友好乖咁幫手推行李,出門前跑去同媽媽道別,見到林麗瑩先是抱起Neinei,再抱起Max走到門口,手抱兩個小朋友出門口互相goodbye kiss,吳尊亦喺太太額上錫左一啖,然後依依不捨上車,一家四口互動實在太羨煞旁人。吳太首次現真身,不過就影唔到個樣,全程只見背影同聽到把聲。到呢集尾聲吳尊同仔女打電話俾老婆時,亦只開語音通話,有別於其他爸爸開視像對話,可見吳尊有幾咁保護老婆。

和情人深深一吻…好Sweet呀﹗(影片截圖)

尚記得以組合飛輪海成員出道嘅吳尊,好快就紅遍東南亞,當時多次吳尊已婚產子消息,佢嘅經紀人都堅稱「尊嫂」其實是「吳尊大嫂」,而女兒則係吳尊家姐個女,至13年尾吳尊終於發聲明承認早已為人父人夫,並透露:「我對那份愛的執著從未改變,認定了就從一而終,為愛情、為未來的生活努力著。是的,我現在是擁有錢都買不到的角色…一個幸福的超級爸爸!」

吳尊為保護太太,只開語音通話免曝光。(影片截圖)

吳尊曾經喺訪問中提到,老婆同自己同歲,16歲時因為姐夫介紹開始拍拖,女方家世顯赫,父親係汶萊王室嘅按摩師及營養師。由拍拖到結婚,吳尊出道變成當紅藝人,一直都極保護林麗瑩免曝光,只有一次2015年網友影到佢地到澳洲旅行,可以見到吳太有一頭烏黑秀髮,身形窈窕完全唔似已經生左兩個小朋友。

2015年網友捕獲吳尊一家出遊,身穿紅裙嘅林麗瑩似小女人般跟喺老公後面。(影片截圖)

+3
+3
+3


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。