【TVB Secrets】臨時演員戲服勁臭 判頭爆離譜:一聞就想嘔

撰文:林通賢
出版:更新:
尹天仇為了劇組飯盒,受盡白眼,現實中的臨時演員其實都非常辛苦。

《喜劇之王》入面,尹天仇飾演的臨時演員,幾經辛苦先得到劇組一個飯盒,現實中在TVB當臨時演員,其實更辛酸,要賺到一個飯盒都不容易,首先你要有驚人耐力,特別是嗅覺,因為那些給臨時演員穿著的戲服,長年不洗,尤其古裝,特別是清兵服,一位前資深臨時演員判頭(化名:阿強):「件衫臭過你疴嗰篤屎!我絕對冇誇張!」

無綫每年盈利億億聲,除了開源,最重要是節流。

阿強是資深臨時判頭,深知做臨時演員辛酸,不要以為當判頭是「指揮官」不用做,大部份判頭都要和其他臨時演員一同落場,一齊著臭衫,他說:「佢哋幾時洗?咪當有幾個判頭一齊投訴,佢哋咪會洗囉,你真係要閉氣先可以打開嗰袋衫,時裝好好多,因為我哋會叫佢哋自備,但古裝我哋邊會有呀?焗著佢哋啲衫。」阿強表示明白劇組冇可能日日洗衫,但有些戲服十年不洗,不要說臭,衞生已是問題。他說:「除非你好污漕,否則你落雨濕晒都唔洗㗎,你跳咗落海,成身泥,變咗泥鴨,佢哋就洗囉。(件衫臭唔臭?)冇一件唔臭!只係分好臭同非常臭,有啲一聞就想嘔!」

古裝臨時演員的戲服最臭,相信演員都會聞到。

阿強更爆服裝部有「獨門」洗衫方式,他說:「佢哋好心嘅,咪會用冷氣吹乾佢囉,因為件衫乾咗,服裝阿姐好拎啲,冇咁重,第日咪俾返我哋著囉。」不過阿強表示服裝部近年年輕化,對臨時演員服裝的處理,人性了許多,他說:「佢哋都會問吓啲助導,幾時會再拍大場面,如果有四日至一星期空檔,佢哋都會攞去洗嘅,不過千年污漬洗得幾多呀?但都明白嘅,因為拍劇日日廠接外景,唔好講話臨時演員,就算一線小生啲古裝衫,其實都好鬼污糟㗎,所以班主角都慘,除咗自己件衫外,俾成班臨時演員圍住都好辛苦,因為真係好臭。」下次重溫《尋秦記》時,大家可能隔住個芒都聞到陣臭味呀!

做臨時演員又豈止著臭衫呢?原來人工依然是十分低廉,以前日薪180蚊,現在實行最低工資,臨時演員待遇有否提升?請留意下一篇TVB Secrets

+1