【多圖】杜汶澤新助理神似薛凱琪：只係心胸廣闊程度唔同

講起杜汶澤，好自然就會諗起《空手道》，講到《空手道》呢套未上映但係已經拍完嘅電影，又會諗起以前「刀仔鋸大樹」嗰套《低俗喜劇》。我都明白，電影同現實「睇落相似」，實質其實就「相差甚遠」。套戲話監製同隻驢「風雨交加」過，唔通現實中又發生過咩 (p.s. 如有雷同純屬巧合)。再者，唔通套戲入面杜汶澤有個「做嘢俹簁」嘅秘書，唔通現實中又真係有咩...咪住先，真係有喎。

近日杜汶澤更加喺facebook上post咗呢張相，仲寫埋「原來世界上所有 intern 都係同一個造型，不過只係心胸廣闊程度唔同。」真係激到圖中右邊個假intern薛凱琪入去留言還擊「加上我那時候只是演intern 而已，不是真的。還有我看不出來廣闊程度有什麼不同？！？？哪裡哪裡哪裡x6」咳，樣貌身材就不便評論 ，不過網民留言似乎都一面倒認為2張相嘅相似程度只限於衣著...

而呢一位靚女新助理就名叫楊浩兒，杜汶澤就叫佢「九妹」或者「狗妹」。九妹更加因為熱愛足球隊曼聯的關係，英文名仲改做Manchester 。根據Instagram顯示Manchester係中文大學新聞系畢業，之後仲喺香港機場做過地勤。杜汶澤講起請佢嘅原因，就話：「主要係針對年青人市場，所以想請成班後生仔女返到嚟公司。係嘛，大家打成一遍咁樣，高啲士氣，所以我哋公司冇大有細嘅。唔好話佢，我都要負責執頭執尾。請到佢返嚟，就希望男同事可以多啲活力咁樣。荷爾蒙標升，又令到創意標升咁樣。」係吖，辦公室有個靚女係唔同啲。不過，宜家阿澤間新公司個辦公室得佢同新助理2個人。唔知阿田又會唔會呷醋呢?

話說杜汶澤近來就積極搞新公司做網媒，原來背後原因都係源自於佢對上一個主持嘅節目。杜汶澤接受《香港01》訪問時說：「咁就要多謝奇妙電視，因為上次喺佢度做咗個《杜汶澤食住上》反應好好，但係大部份人都喺網上睇。作為表演藝人，除咗收人工片酬之外，就梗係想多啲人睇啦，於是乎我就諗到做網媒。網媒個名就叫做『HAHAHA』。初部構思就係做一個live-talk show，訪問明星嘉賓或者素人。」

關於呢點，杜汶澤就解釋說：「人哋寄信嚟應徵，跟住嚟到見工。你話人哋樣靚身材好唔請人，你即係歧視人哋啫。個胸大冇罪㗎，人哋都係嚟打工啫。楊浩兒，即係九妹，本身就讀新聞系嘅，佢除咗要幫我掃地洗衫抹枱之外呢，仲要去搵一啲新聞題材返嚟，等我可以訪問一啲人同做專題探訪咁樣。佢真係一手包辦㗎，又要資料搜集又要抹地。新人最緊要抵得諗，佢就滿足曬我要求啦。」不過照咁睇楊浩兒都唔似《低俗喜劇》入面個秘書「做嘢俹簁」嘅，杜汶澤仲似乎好滿意佢添。