【使徒行者2】飛機哥張景淳入行14年 仍然等機會:著眼點唔係錢

撰文:
最後更新日期:

《使徒行者2》播了一個星期,反應都算好,戲中除了一眾主角出位之外,有一些配角都值得留意,就好像Victor(陳豪飾)的手下飛機-張景淳。

呢個造型都多人都話似陳浩南。(Instagram圖片)

一頭長髮,在劇中以打手形式出場的張景淳,有不少網民話一見到佢就覺得好有陳浩南影子,究竟是否有所參考當年鄭伊健的造型呢?在接受《香港01》訪問時,他說:「我都見到好多人都有講似陳浩南,但係的確係無參考過,因為我本身都係長頭髮嘅,咁我拍之前我又唔想剪,就問監製可唔可以keep住呢個髮型。當時我試鏡一個警察角色,但監製話我髮型都係似古惑仔多啲,所以就轉咗做長興頭馬呢個角色。到我第一日造形,佢哋已經預備好晒啲衫,但其實我戲中身邊嘅兄弟都係呢款衫,俾到錯覺大家可能都係因為個髮型。」不過其實這個造型跟電影《黑社會》入面的張家輝更為相似,除了一樣以皮褸和打手做招徠,連個名都一樣,點解?因為兩套都有葉天成做編劇嘛!

戲入面好多動作場面都係親身上陣。(劇照)

入行十四年,當初由劉德華所屬的加際唱片公司力捧的男女實力新組合Cheers出道,09年進入TVB,一直以後都是一些跑龍套角色,多年來只有一套《天與地》的家明為人所熟識。演員的生命雖然可以好長時間,但一直都不能上位,會否想過退出?他說:「其實我自己覺得演員真係好被動,好睇你接到啲咩角色,嗰陣接到家明呢個角色係好適合我去做,所有嘢都好符合我當時嘅條件,喺天時地利人和都好嘅情況吓,的確係做到啲回響出嚟。之後我一直都有努力,嘗試去做唔同嘅角色,我覺得要等一個好嘅機會,其實每個演員都係等緊呢樣嘢。好似《使徒行者2》同《飛虎極戰》我都係做一個反派嘅角色,都係有動作場面,有打有飛車,我都會試吓親身上陣,基本上大部分都係自己完成,當中當然都會有受傷,但我都想做好件事。戲入面我未必會有一條故事線,但起碼我出現嗰陣都會有啲動作場面,希望大家會鍾意,見到第二面嘅我,我就係咁樣去進步。」

你有無聽過呢隊組合?(網上圖片)

家明雖然令Stanley成功令觀眾留下印象,不過大家只就將他變成了家明,真正認識他的人少之有少,Stanley感嘆:「其實以前叫親我嘅十成都係叫家明,而家好少少,可能有4個叫家明,2個叫我個名,其他都仲係唔記得我叫咩名。其實我都有諗過家明究竟係幫咗我,定係幫我定咗型,但係如果唔係家明,我根本無機會爆出。一來我唔係演藝出身,二來其實我私底下唔識爭取,唔識去表現自己,我通常都係坐喺度等,只可以透過角色去等監製留意我,所以覺得家明始終都係幫我多過壓住我。」

大家都仲記得佢係家明。(劇照)

既然一直都未有所成,留在這裡的原因主要就是一直以來對演戲的執著,那道火在Stanley心中依然燃燒,他說:「我本身唔會覺得一定要去到好成功先可以留喺呢一行,或者留喺呢間公司嘅價值,因為我見個自己偶像祥哥(黎耀祥),佢自己成功嘅時間都係有佢自己嘅timing,姐係我講緊一啲成功比較晏嘅晏子,德斌都係其中一個。所以我覺得每一個人都自己嘅timing,每人都有自己嘅機遇,最緊要自己係咪enjoy緊嗰樣嘢,一日有機會俾我做戲,我都會繼續留喺度。當然我都有諗過人工嘅問題,不過而家都維持到生活嘅,我都有做埋主持,基本上都維持到生活水平。不過我嘅著眼點唔係錢嗰方面,反而係做戲希望有成績,我仲係未死心架,有啲嘢點都要等一陣。所以我都要另一半理解呢樣嘢,要搵一個可以同我一齊捱嘅女朋友,咁我而家無女朋友喇,壓力都低啲,如果有都要俾佢知道我嘅狀態。屋企人都好支持我,我媽咪好鍾意見到自己個仔喺電視出鏡。」老土講句,機會係留俾有準備嘅人,十年磨一劍,可能下一套就會是你當上主角,加油!他的名字叫張景淳。

希望大家會記得他的名字。(Instagram圖片)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。