《反黑》演招積參考Joker 張建聲:入行6年終於有人留意我

撰文:
最後更新日期:

張建聲在第一集的角色跟之後有很大反差。

講起張建聲 (Justin) 這個演員大家會諗到甚麼?以前一定是向西仔,入行6年至今已拍了多部三級片的他,其中《3D肉蒲團之極樂寶鑑》、《一路向西》以及《壹獄壹世界》最令人印象深刻,三級男星幾乎成了他的代名詞,仲要經常都是演咸濕仔。

即使他為拍《壹獄》花一年時間狂谷肥自己之後又狂減,讓人見識到他的專業,話畀大家知道他為部戲個角色可以去到幾盡,但大家的記憶始終停留在他的情慾戲上。而現在,講起張建聲,一定是會即刻諗起「招積」,他在網劇《反黑》中所飾演的角色。這套《反黑》的招積一角引起了很大迴響,Justin演得非常出色,更成功為他洗底。

招積仍未化身做惡魔之前。

這個機會他等了6年,6年間他由一張白紙成長到演活了招積,演技首次備受激讚,Justin表示:「真係終於畀我等到喇,可以話係苦盡甘來。以前成日都畀人覺得我係三級片男星,最初都會好介意,後來會問自己『做咩要介意啫,我都不過係做演員啫。』如果唔係嗰時我拍《向西》打破咗自己個框架,又點會有今日嘅我,我好多謝呢部戲,令我可以甩開晒我嘅包袱,影響形象就實有㗎喇,首先係要放低自己個樣。我而家反而好appriciate有呢個經驗,唔係咁易可以得到嘅,唔知我老闆係咪特登,次次都畀啲咁難應付嘅角色我去演。」

張建聲演活了招積一角,完全擺脫了他本身的形象。

很多人都會好奇,這6年Justin是怎麼捱過來的,原來他從來沒有想過要放棄:「6年來由向西仔到大肥仔再到招積,開始有人會respect我啲戲。一直堅持落去第一要有忍耐力,要企得住腳,我好慶幸有咁多磨練我演技嘅機會。拍《壹獄》前增肥嗰一年,我都曾經無晒鬥志,無晒方向,又無錢,我咪日日喺屋企睇戲,睇到有邊個鏡頭邊場戲覺得好就即刻自己練,對住塊鏡練,又會出街觀察啲人,做演員真係要做好多功課。」

 

眼神表情通通係戲,但又自然到唔似做緊戲。

機會永遠留給有準備的人,就是因為Justin一直努力下苦功,才能讓招積一角大放異彩:「開頭播嗰兩集會見到有網民會話如果搵吳鎮宇,張耀揚嚟演招積咪仲好睇,都會有hard feeling,但啲人竟然拎我同呢兩位反派代表人物去比較,其實係我嘅光榮。之後當套劇繼續播落去就無人再咁講,而係會覺得我演嘅招積已經成新一代反派代表,真係好開心。我可以真真正正咁話畀人知,我係一個演員,有用功用心去演戲。」

招積成了新一代反派代表。

Justin憑着這個角色獲網民激讚他的演技出色,雖然是大反派,卻深網民喜愛,不是喜歡他這個角色,而是喜歡看他怎去演活這個角色,紛紛讚他演得入型入格,角色前後反差極大,內心戲勁好睇,有影帝級甚至神級演技,相當耀眼,亦成為了大家追看該劇的主要原因之一。這套劇於香港和內地都有得播,內地網民收看時可以即時打彈幕分享感受,每當見到招積出場都會看得份外投入和肉緊。

完全演繹到嗰種癲喪感覺。

對於外界一致的好評,Justin當然好開心,不過並沒有感到飄飄然,清楚明白演好戲是一個演員最基本的:「我唔會畀人讚就覺得升咗上天,自覺仍然有好多不足,可以做得更好。我想一步一步去感受去領會,我唔係要做明星,我係做演員,對我嚟講演戲大過天,如果個人唔紅但一直有戲拍,我都願,我情願係咁樣,可以一直演落去演到老,我個人好低調,淨係想專注演戲。今次真係好感恩,入行六年以嚟終於有人覺得呢個0靚仔係識演戲。啲網民真係記得晒我喺戲入面做過啲咩,我好appriciate佢哋原來真係會咁留意我,記得我啲戲之餘仲要咁鍾意,自己作為演員最開心係呢啲位。」

網民非常期待嘅一幕,招積同鳳凰8年後再度見面。

Justin在《反黑》中演技大爆發,不過他卻不敢睇返自己初入行時的作品,更曾經好驚演戲:「我做model出身,之後入行就拍三級片,我好多謝老闆蕭定一畀咁多機會我,令我可以從經驗中學習。我自己從來無學過演戲,只係去過一個街坊福利會教話劇嘅地方上過堂,嗰度係6歲到50歲嘅人都有。當時嘅心態並唔好受,我話晒都做過男主角吖,竟然要同啲街坊一齊學戲?我嗰時好害怕拍戲,從無話一心想做明星,只係當時做咗兩年model覺得係時候要轉一轉。我亦唔敢睇返自己以前啲戲,嗰時自己真係張白紙,咩都唔識,仲要一嚟就做男主角,極大壓力。但係反而有網民話鍾意我以前好pure嗰種感覺。」

內地網民邊睇邊發彈幕,睇得好投入。

而因為街坊福利會一位導師的一句話令Justin開竅了:「佢教我話『What is art,art is life』我聽完之後感覺即刻明白咗演戲同生活嘅關係,亦挑起咗我條戲癮。」這句說話也是在他入行後的低潮期時聽到:「接拍《壹獄》之前足足一年無嘢撈,無任何工作,老闆咪叫我去學下嘢增值下自己。嗰年我爸爸因癌症走咗,喺佢住院期間我日日都要去照顧佢,幫佢換片幫佢沖涼,第一次有親人離世,係慢慢咁陪住佢睇住佢走,好難過。呢段經歷亦令我急速咁成長,喺演戲上開咗竅,人生多咗閱歷多咗體會對演技真係有幫助。觀眾同網民讚我梗係開心,做到行內人都讚賞我嘅演技,我仲開心。」

張建聲因為爸爸離世令佢急速成長,亦令他在演戲上開了竅。

Justin坦言今次所演的招積,是他從影以來最大挑戰的一次,唔講唔知,原來這個角色是想向「Joker」(小丑) 致敬,咁的確係向高難度挑戰喎:「招積係我同導演一齊度出嚟嘅角色,原本係得三組戲,結果變成貫穿晒成個故仔嘅人物。我同中仔 (該劇導演宋本中) 太熟喇,係好兄弟嚟,佢知我好鍾意小丑,又知我一直都想演精神病人,佢對我好有信心,我哋都開咗好多次會,好認真咁去研究招積嘅行為心態,例如眼神同點笑,當然都有參考小丑啦。」

《反黑》劇組陣容強大。

+15
+14
+13


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。