【爸爸去哪兒】陳小春被應采兒鬧 山雞收晒火：你是大哥我是小弟
撰文：李妍樺
出版：更新：
今集《爸爸去哪兒5》講到Jasper病咗都要上節目，因為病到入醫院，所以係下半部份陳小春兩父子先至出現，但佢哋依舊仲係焦點所在。前2集大家都好留意陳小春發脾氣呼喂阿囝，今集陳小春就嚟個180度大改變，成集幾乎未見過陳小春發老脾，全程都係好好態度，到夜晚食飯嗰陣仲主動叫Jasper食飯先，佢笑笑口咁話：「你是大哥，我是小弟，你先吃。」Jasper聽到都嚇到呆一呆，明明平時畀人鬧到暈，突然間就變大哥，山雞哥做咩有咁大嘅轉變？原來上集老婆應采兒見到阿囝咁慘，返到屋企就好好教訓咗陳小春一餐，佢複述道：「上集給我老婆看到，她說你不要這樣子對兒子，別人看到不好看的嘛！」山雞哥全世界最怕的人竟然不是浩南哥，而是老婆丁丁。
陳小春主動叫人做老大，真係好少見！（網上截圖）
你睇Jasper冧到......
+7
陳小春嘅脾氣完全畀丁丁清晒咁滯，記得上次因為Jasper著襪踩落地，畀小春鬧佢Dirty，今集真係風水輪流轉，小朋友Jasper依舊整到腳仔污糟，唔同嘅係小春親自燒柴煲水幫囝囝洗腳，原來今次係Jasper出世咁耐小春第一次幫囝囝洗腳，Jasper舒服成個人飄飄然，又大讚小春：「爸爸好舒服，你怎麼弄的？」，小春即刻扮型話求其整嘅，成個畫面相當溫馨！
其實咁樣咪好囉，一對父子就應該係咁樣相親相愛，事後小春提起幫Jasper洗腳呢件事，講到眼濕濕：「就算以後爸爸老了不能走路了，你不幫我洗，但那天晚上我幫他洗腳的那一刻，我永遠會記得。」
山雞哥幫人洗腳都係第一次。（網上截圖）
+4