楊怡羅仲謙結婚一周年　公然打情罵俏網上放閃

結婚唔係一段感情嘅大結局，而係人生新階段嘅開始，兩個人依舊要努力去維繫感情，才可以細水長流。羅仲謙同楊怡結婚以來，除咗去度蜜月一直聚少離多，謙謙忙住扮沙僧拍西遊記，楊怡亦連接兩套舞台劇到處巡迴演出。10月2日係羅先生羅太結婚一周年紀念，終於夾啱時間去旅行，仲喺IG微博放閃又不時開LIVE，但係點解多咗3位電燈膽呢？

楊怡喺微博上載一張同謙謙嘅合照，相片中謙謙用強而有力嘅臂彎抱實老婆仔，兩個人情深對望眼中只剩下對方。阿怡仲留下一段Caption：「Our first wedding anniversary.Thanks for being in my life. （我們首個結婚周年紀念，感激你在我生命中出現。）」謙謙亦馬上轉載兼留言話：「一年後的今日，老婆！多謝你！愛你！願你一世平安快樂！」真係睇到都sweet到起晒雞皮呀。

不過呢次旅程就唔單止得羅先生羅太，楊怡開直播時，見到同枱仲有周麗淇、郭晉安以及袁偉豪，於布拉格街頭齊齊歎緊咖啡，成班人喺度話自己唔識開live嗌晒救命咁。翻查各人嘅社交網站，Niki有上載一張喺機場嘅合照，即係5個人一齊搭飛機到當地，而唔係咁啱撞到啦，佢仲加上Hashtag #五星旅行團，莫非好似胡說八道會咁樣拍個新嘅旅遊節目？據知楊怡應該係同周麗淇、郭晉安以及袁偉豪到當地拍攝新劇《再創世紀》，原來謙謙係趁假期做跟得人夫陪老婆開工，順道慶祝結婚周年先至真。