又硬銷Big Big Channel？ 半小時6個單元好嘈呀﹗
今日就係一年一度人月兩團圓嘅中秋節，TVB於迎月夜即係3號晚上，製作1個特備節目《big big channel失驚無神賀中秋》，正確來說應該是6個節目，因為半小時內雲集數十位藝人同時拍攝6個單元。點解會咁？咪又係要宣傳TVB最重視嘅big big channel囉。節目中提「big big channel」呢個名應該講咗過百次，加上不停轉來轉去影唔同單元，幾十個藝人七嘴八舌，網友都不禁話：「又亂又嘈，好暈呀﹗」
《Big Big Channel失驚無神賀中秋》節目中，除咗Ben Sir嘅《Ben Sir睇樓團》本身於翡翠台播出，馮盈盈嘅《＃後生仔傾吓偈》於J2台播出，其他4個單元都係Big Big Channel嘅環節：蝦頭、莊思敏等為「明星麻雀王大賽」終極決戰熱身、高海寧和湯洛雯則在「美女廚房」烹調美食，由Bob試食品評、黃美棋及蔣怡等女藝人接受「捽碟」考驗。
好似每個單元都有D Mission，但實情係無結果架，因為要叫大家去Big Big Channel睇埋個ending呀嗎……要喺不足30分鐘節目內，做齊6個單元，不停穿插除開每part得4、5分鐘，到底做到D乜呢？唔通今時今日仲會覺得，好多人好多聲音就等於有節日氣氛？
最令人詫異嘅係，居然搵來３位亞洲小姐出身嘅陳煒、袁潔儀、楊玉梅，開宗明義來個「亞姐妝速挑戰賽」，雖然3位40+女藝人總算保養得宜，好勇敢地以素顏上陣挑戰化妝，不過喺TVB見到一堆亞姐，Ben sir仲要講「亞視永恆」，再接6號唱happy birthday to me，除咗係想繼續食回憶呢條水，真係唔知可以點解讀啦。雖則話集體回憶容易有迴響，之前蔣嘉瑩現身《流行經典50年》，唱亞視《我和殭屍有個約會》主題曲大家都好受落，不過好橋用得多好易物極必反引起來反彈㗎。