陳展鵬自爆離巢亞視原因　被欠薪仲要被雪藏：亂到七彩

陳展鵬 (煎pan) 現已貴為無綫視帝，劇集拍完一套又一套，工作接個不停，絕對比起他在亞視時風光好多，直情登上了他演藝事業的高峰。雖然仍有人會覺得煎pan擺脫不了那股亞視味，不過他卻從沒有嫌棄過這個被稱為弱台的地方，原來當年他離開亞視也是迫不得己的。

他早前接受商台的《一圈圈 星光背後》訪問時，重提因何會離開亞視表示：「其實我嗰時都唔想走㗎，因為我 (喺亞視) 機會好多，又露股啦，乜都做晒，又旅遊特輯啦，又拍戲啦，又配音啦、台慶又要唱歌表演啦，選亞姐又有我份啦，好多範疇都做過晒。但因為事實上當時亞視比較亂，太多個老闆接手，同埋管理階層亦都好多，咁我係因為一件事而離開。」

到底甚麼事成了煎pan離巢的導火線呢？他繼說：「我記得嗰陣時公司要我哋做返Staff (原本是藝員) ，將我哋轉為工作人員，淨係每個月畀錢，咁都ok嘅，我覺得。但係可能內部嘅政策問題啦，如果你做演員繼續拍劇呢，咁就唔可以拍綜藝嘅嘢喇，好多變動變動得好緊要。到後來我決定唔簽做Staff喇，無戲拍嘅時候我就同公司講可唔可以畀我拍綜藝節目呀，公司話得，無問題，八折吖，開啲咁嘅條件，亂到七彩。咁八折我都照做呢啲綜藝節目，唔緊要。」煎pan果然好抵得諗，為份工被剝削都不計較。

但當再遇到無理要求時，煎pan這次就不肯就範了：「之後我又有機會拍劇喇喎，綜藝嗰邊又搵我，要我着李小龍嗰套衫，黃色嗰套衫去拍一個廣告，我話『嘩吓，我呢排完全無操，有肚腩喎，可唔可以畀少少時間我呀？』佢話唔得呀，後日要拍㗎喇，我話唔掂喎，我對我自己都有要求，由姑至終我都無諗過亞視有無人睇，有幾多人睇，我都要做好我自己本份先。而因為呢件事佢就話我唔聽話，跟住話要雪藏我。但係要明白到，嗰時我同亞視係無簽過合約，係零合約，仲話要雪藏？我有兩個月前啲糧都未畀我呀，你話要雪藏我？嗰次之後就差唔多時間，覺得係時候要走喇，於是就決定返TVB。」

向來感情低調的他，又談到當年在TVB開始上位後與前女友，亞姐冠軍姚嘉雯分手的原因：「真係無時間，我當時將所有專注力都放晒喺工作上，拍劇時間又長，拍緊時又唔開得電話，好似失咗縱咁，我又無車，好多時都陪唔到佢，甚至連見面嘅時間都無。我都明白作為女仔，都會擔心自己將來嘅幸福，又會無安全感，加加埋埋有好多問題出現。」雖然兩人分手收場，不過再見亦是朋友。