【男神封盤】鹿晗公開認愛關曉彤　拍劇擦出愛火已見家長？

鹿晗自出道以來，其清秀外型一直為佢帶嚟源源不絕嘅工作機會，而最新嘅福布斯中國名人榜中，27歲嘅鹿晗更以年賺2.5億佔據第二位，絕對配得上年青有為四隻字。雖然早年曾經有傳鹿晗已經結婚甚至育有一子，而之前又因合作《跑男》，而同女星迪麗熱巴傳出緋聞，但粉絲都堅信「鹿晗是我男友」……直到今日呢位國民男友喺微博公布：「大家好，給大家介绍一下，這是我女朋友@關曉彤」三千萬粉絲即時宣告失戀！而關曉彤亦隨即在微博以「哎呀嘛，咔咔的！」並符上愛心作回應，而二人的工作室以及《跑男》成員陳赫亦相繼送上祝福。

話說，鹿晗同關曉彤早前曾一齊合作時裝劇《甜蜜暴擊》，劇中鹿晗飾演一名拳手，被飾演大財團繼承人嘅關曉彤所發掘，有感情戲有咀戲，更有唔少粉絲指拍攝期間二人不時以情侶裝上陣，劇集上月剛煞青，二人有無必要利用戀情作宣傳就真係不得而知，但鹿晗就曾經話過自己如果有女朋友的話，一定會公開，今次似乎坐言起行。至於千萬唔願接受現實嘅粉絲，就笑指鹿晗微博疑被黑客入侵。