【鹿彤戀】無法接受鹿晗認愛關曉彤 網傳粉絲自殘 幸好證實誤傳
撰文：洪曉璇
出版：更新：
成日話藝人身為公眾人物，要小心一言一行影響大眾，咁到底影響力可以有幾咁無遠弗屆？鹿晗呢次無預警認愛「國民閨女」關曉彤可以話係最佳例子，除咗話題熱度登上熱搜榜第一名，坐擁4000萬鹿粉嘅佢更令微博癱瘓，負荷唔到太大流量而發生問題，導致鹿晗微博留言功能一度無法開啟。更嚴重嘅係傳出多位粉絲因為偶像認愛而自殘！
呢位鹿粉上載危坐天台照及鎅手滴血照，令人擔憂。(微博圖片)
「鹿彤」戀公開後，粉絲一度認為佢地只係為合作拍攝嘅時裝劇《甜蜜暴擊》宣傳，後來雙方工作室正式確認戀情後，大批粉絲表示不能接受，留言數量以幾何級數上升，當中更有人上載危坐天台照及鎅手滴血照，留言話：「嗯你們兩呵呵，鹿晗關曉彤，悲傷到無法用言語來形容。悲傷的語無倫次……我什麼也不想說了，我。。我不想說話了就造樣，性福。」幸好悲劇未有發生，呢位粉絲事後有再發兩篇微博，澄清照片係早前拍下，而自己嘅傷勢唔嚴重，於其他網友力勸下同大罵之下，對帶來負面消息而感到抱歉，並表示會刪除微博。
西南大學發文澄清自殺一事不實。(微博圖片)
有網友提起當年成龍認愛，多名粉絲自殘一事。(微博圖片)
除此以外亦傳出多名鹿粉哭崩至休克要入醫院，亦有網民稱患有抑鬱症嘅粉絲朋友，接受唔到偶像認愛，而喺重慶西南大學跳樓自殺身亡！不過校方馬上發文澄清，表示8號下午的確有一名男子於學校意外墜樓，但同網傳「西南大學女生為鹿晗跳樓」事件真相不符。嚴重失實，會保留法律追究權利。
雖然幾單自殘消息真偽都未能確認，不過有人就提起事情發展，同1982年成龍公布有女友，以致日本多名女粉絲跳海卧軌一事，怕歷史會有機會重演，亦提醒大家要理智，要為家人設想，照顧好身邊嘅鹿粉免做傻事。