【港女講感情】關曉彤鹿晗拍拖唔係童話故事 自身條件優秀好重要
尋日鹿晗認愛關曉彤成為城中熱話，微博仲因為咁而死機，鹿晗幾千萬粉絲當然嬲嬲豬，即刻去起底關曉彤到底係乜水，仲搵到佢幾年前Po嘅相，逐張逐張去鬧佢，愛之深恨之切，大家都可以想像呢班粉絲有幾愛鹿晗，有網傳話有粉絲因為知道佢兩個拍拖，仲話要鎅手自殺，好彩最尾證實係假嘅。鹿晗個勢咁勁，仲有淘寶商家趁機撈一筆，話只要證實到係鹿晗嘅粉絲（好似話要Cap微博/朋友圈圖），買嘢有折扣，仲搞笑話只要知道係關曉彤粉絲，即刻加多你幾蚊！
鹿晗喺大陸被大家叫佢做「國民小鮮肉」，個個當正佢係男神，未結婚嘅就當佢係對象，結咗婚嘅仲誇到話要生個女都要同佢結婚，今次鹿晗公開女友關曉彤身份，可以話係全國陷入失戀狀態。大家對關曉彤都又愛又恨，嬲就當然嬲佢搶咗自己個FF老公，但又無可否認，佢的確各方面條件都好好，講真，就算鹿晗唔係同關曉彤一齊，都唔會輪到自己，清醒吓啦大家！
關曉彤的確係人生勝利者，贏並唔係因為佢係鹿晗女友，而係因為佢好有上進心，係呀，就係港女最鍾意提嘅「上進心」！成日都話男人窮唔緊張，最緊要有上進心嗰個上進心，關曉彤就係最好嘅例子。
佢4歲已經做童星出嚟拍劇，係呀，已經自己搵零用錢，仲要本身屋企都好有錢，聽講係官唔知幾多代，但佢並冇荒廢學業，由細到大都係學霸，考第一對佢嚟講易過食生菜，學業事業都咁得意嘅時候，大家都會諗佢有冇拍拖。關曉彤曾經講話屋企人管佢好嚴，唔希望佢讀書時候拍拖，甚至連拍戲錫吓都唔得，阿媽仲兇佢叫佢自己諗清楚。少女點會唔想拍拖，佢話身邊拍拖嘅朋友都好幾對，但為咗讀書，佢除咗Part-time拍劇之外，其餘時間都拎嚟搵書，佢講過：「高考前我許的願是用一年單身換高考取得好成績。」好喇，最尾關曉彤真係成功咗，爆分用狀元姿態入北京電影學院，最後拍劇同鹿晗戲假情真。
所以關曉彤同鹿晗拍拖並唔係咩童話故事，女仔只要有上進心，自身條件都好嘅時候，自然會吸引到優秀嘅人，各位失戀嘅小粉絲，都係專心讀好啲書啦！