【如懿傳】霍建華享齊人之福　周迅與15妃子超高顏值

90集長劇《如懿傳》已定於明年1月1日首播，由於此劇出自《甄嬛傳》同一作者流瀲紫，再加上女主角周迅已經10幾年未有拍劇，男主角霍建華前作《花千骨》有口碑有收視，令劇集籌備至今，都話題性十足。《如懿傳》講述如懿因與乾隆青梅竹馬關係而成為貴妃，受眾人排擠之餘，如懿家族同太后又係世仇，令如懿危機四伏。雖然乾隆最後將如懿推上皇后位置，但當年天真小子已變得多疑善變且自私，二人情意信任漸漸消滅。

劇集開拍前，有唔少網友都質疑周迅42歲難以詮釋貌美如花嘅如懿，直到劇照一出，網友都紛紛讚好。連帶15妃子嘅顏值都備受關注，眾妃當中，以張鈞甯較為大家所熟識，近年轉戰大陸嘅佢，憑《武則天》水漲船高，更與范冰冰成為好友。35歲的張鈞甯於《甄嬛傳》中，終於唔使再做惡女，飾演海蘭愉貴妃，同如懿係真心好姊妹。

同樣係如懿好姊妹嘅仲有舒妃，由內地女星陳昊宇飾演，陳昊宇早年曾經去到台灣做交換生，並參加過《華人星光大道3》得到冠軍。兩年前，以網劇《超霸花神》出道，雖然演出經驗唔多，但能夠成為《如懿傳》妃子之一，證明都有番咁上下實力。

而於《楚喬傳》飾演元淳公主嘅李沁，今次做嘅香妃寒香見，有指係對應《還珠格格》嘅香妃，要知道香紀一角堪稱女神級別，90後李沁到底能唔能夠駕馭呢？怕且要留待劇集播出時，觀眾自行判斷。李沁近年屢被傳整容，雖然有唔少before & after圖片，但睇落又唔係好大分別。

出道時就有「小章子怡」之稱嘅童瑤，於劇中飾演體弱多病嘅高晞月（皇貴妃），一生無子，於是處處同如懿作對，係太后嘅同謀之一。童瑤近年成功打開古裝劇市場，更被稱為「古裝美人」，所以當《如懿傳》名單上出現童瑤一名後，劇迷都表示安心。

於網劇《匆匆那年》散發出仙氣嘅何泓姍，喺《如懿傳》中一樣係咁pure，而且擅長琵琶彈奏，係乾隆前期寵幸嘅白蕊姬玫嬪，不過由於性格過於善良，所以不時被人利用同如懿作對，更試過用鐵鞭抽打如懿。