【任噏亂評】如果你對電視劇有要求 其實《短暫的婚姻 》好啱睇

撰文:
最後更新日期:

好多人冇再睇嘅原因,不外乎係覺得大台劇劇情重覆之餘又稍嫌離地。其實膠劇一樣可以好好睇,大家仍然會搵返王晶早年拍嘅笑片出嚟睇。離地亦都冇錯㗎,正所謂「青菜蘿蔔各有所好」,有人睇TVB,有啲人睇美劇英劇,又有啲人睇韓劇,咁其實,大家係咪應該抽時間睇下ViuTV啲製作呢?

今晚大結局,唔知個發展會點呢?(電視截圖)

例如ViuTV套《短暫的婚姻 》真係劇如其名,「短暫」。全套劇成個故事前前後後加埋都係得5集,每集半粒鐘但係個畫面好似睇緊電影。故事對白唔似得大台劇咁緊湊,套套都有爆炸槍戰,愛情線又好似蜘蛛網咁。先唔詳細講劇情,單係套劇,搵咗歌神陳奕迅同拍《點五步》嘅陳志發導演嚟拍,就已經值得每日花30分鐘時間嚟睇。你諗下,Eason對上一套電視劇已經係11年嘅香港電台劇集《獅子山下2006》。請到陳奕迅出山拍劇,劇本點都唔會差得去邊掛?至於陳志發,其實佢係一個新(進)導演,佢套《點五步》仲係2016年金像獎最佳電影提名,又係第23屆香港電影評論學會大獎嘅推薦電影。

都好睇以為陳奕迅淨係識唱歌,其實佢做戲都幾好。(電視截圖)

當然,演員導演呢啲嘢之外,劇情對白都係考量之一。《短暫的婚姻 》個劇情就簡單啲,講喪妻嘅男主角(陳奕迅)有一日遇上咗新搬入同一橦大廈人妻女主角(蔡思韵),跟住故事嘅走向,就講佢哋之間開始由相識到慢慢發展出愛情。由一開始第一集邂逅,到第二集男主角發見咗女主角丈夫有第三者,第三集男主角決定到英國發展,再到第四集男女主角喺英國遇到之後再萌生愛情(第五集結局,估計男女主角唔會有下文)。基本上你可以當佢係一部小品愛情電影一次過睇曬,更加唔會有絲毫大台劇嗰種拖劇情質關子嘅感覺。

第4集嚟講,呢幕印象好深。(電視截圖)

除咗劇情之外,每集對白都會講一啲婚姻上面嘅道理。例如第四集入面,陳奕迅就用第三身嘅方法講:「有時有些事情跟過去沒關係,而是他怎樣選擇自己的將來。有些婚姻結束,是因為其中一方離席。有些婚姻結束,是因為二人不再同心。究竟哪種結束是最可怕的?是雖死猶生,還是雖生猶死。」又或者預告入面嘅對白:「真心相愛的人,不能天長地久。胡胡混混,反而容易白頭皆老。上天究竟是怎樣拿捏因果報應。」就咁睇都感覺到編劇寫劇本個位嘅心機,相反大台劇就冇咁著重喺呢一方面。

其實《短暫的婚姻 》入面想同講嘅信息,係需要慢慢消化。短短地五集,可能仲好睇過長篇大論嘅三五十集。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。