傳賀軍翔無法忍受狂NG爆粗　鍾欣潼淚灑當場

最近承認新戀情嘅阿嬌鍾欣潼，因為喺台灣留咗幾個月，拍攝瞿友寧執導的新戲《動物系戀人啊》，多咗時間留喺台灣，同男友增加相處時間令感情不斷升溫。戲就已經拍完啦，不過呢日忽然傳出劇組煞科前幾日，阿嬌中途飛往內地參加商演，趕返劇組後因為太攰不在狀態頻頻NG，拍檔賀軍翔怒極以粗口謾罵，令阿嬌淚灑當場。

有傳9月底煞科前幾日，阿嬌請假到內地多處商演，有一日佢剛剛趕返劇組，疑似因為舟車勞頓過累，背唔好劇本導致NG連連，同場嘅賀軍翔忍唔住爆粗回應，令阿嬌當場痛哭。有傳媒向導演瞿友寧查詢，佢承認有見到阿嬌喊：「那天我沒有聽到也沒看到賀軍翔有罵髒話，但阿嬌有哭，她事後有傳簡訊給我道歉，說真的是太累所以詞沒有背好。我說沒關係，休息就好了，之後都拍得很順利。」導演仲話殺青時見到阿嬌同賀軍翔關係唔錯，仲互相擁抱。」 針對此事，賀軍翔透過發言人否認話：「合作得非常愉快，不需要渲染不實的傳言。」

阿嬌嘅經理人霍汶希亦有就此事回應：「接呢套劇嘅時候本身係三個月拍攝，但接劇前已經確認有巡迴演唱會，所以一早請咗假喺臨殺青前，離開幾日去開演唱會。阿嬌開完騷廿幾個鐘無瞓過覺馬上趕返劇組，個人真係好攰，而當日拍攝嘅一場戲係無對白嘅，只係要餵賀軍翔食Cream。不過因為阿嬌實在太攰啦，聽唔到導演指示因此而NG，阿嬌只係自責做得唔好所以喊，並唔係因為劇本問題，賀軍翔亦絕對無鬧過佢。」Mani話因為阿嬌喊到收唔到聲，令當日無法繼續進行拍攝，事後已經向劇組、導演以及賀軍翔道歉。