【任噏亂評】兩劇收視都輸俾《流行經典50年》 下次邊套做炮灰?

撰文:黃梓恒
出版:更新:
《流行經典50年》終於落幕。(電視畫面)

無綫的音樂節目《流行經典50年》系列做咗29集終於要結束,可能自知已經去到強弩之末,所以在轉時段搞《流行經典50年 唱爆周末》而收視都無法回升之後,已經再無聽到會再繼續拍落去。不過不得不提的是,在最初節目以《流行經典50強》出現的時候,反應的確十分熱烈,在星期日的時段播了七個星期平均都有22.1點,收視甚至好過一些平日播的劇集。亦因為咁因為加推了《流行經典50年》,反應繼續熱烈,甚至試過有一集平均收視上到27點,差唔多等於《同盟》大結果,放喺星期日嚟講已經好勁,要知道一樣放喺周末播放的《踩過界》,大結局收視平均都係得26.9點咋。

《踩過界》放喺平日播收視會唔同。(劇照)

本來《流行經典50年》一直都是放在星期日播放,直到上個月尾開始,為了讓路給《雜警奇兵》才改為星期六。但《雜警奇兵》收視應真係麻麻,播放了四星期,平均收視只錄得20.9、17.9和19.8(最新一集暫時未公布收視),對比返《流行經典50強》同樣在星期日相同的時間,平均收視差距接近3點。其實未必是《雜警奇兵》的問題,睇返《踩過界》,出面的口碑不俗,但頭六集(三個周末)一樣只錄得20、19和18的低收視,咁究竟點解兩套劇集的收視都俾一個音樂節目差呢?

《雜警奇兵》收視唔理想。(劇照)

問題可能不在於劇本、演員等等屬於劇集的問題,而是時間。一般人都知道劇集只會在星期一至五播放,之前無綫試過一星期播足七日,結果收視就係俾周末兩日拉抵,試咗不久又再變陣,決定放喺星期六日播,可能是想模仿五年前《飛虎》創下平均收視28點的佳績。可惜,一套喺大陸點擊爆紅的《踩過界》,放喺周末播一樣收視慘淡,結果星期六日播放這個制度,玩咗一套劇又唔玩喇。去到而家,變成星期日一口氣播兩個鐘的《雜警奇兵》,玩法相信係參考外國劇集的橫線播放,每星期只播一集。不過事如願違,香港人始終都未接納到這種玩法,而無綫又不停將個制度轉來轉去,正所謂人是習慣的動物,你要日周末乖乖安座家中睇你嘅劇集,但又將啲時間調來調去,要人點習慣呢?一套劇集隨時就係俾呢個制度玩死,而大家都習慣周末會睇一啲綜藝節目,加上《流行經典50年》又打正集體回憶的旗號,砌贏兩套劇集實在不足為奇了。

呢套好有機會成為下一套周末劇。(視覺中國)