謝霆鋒15歲訪問出土 早「認定」王菲作伴侶
撰文：洪曉璇
出版：更新：
緣份暝暝中將兩個人拉近，相知相戀攜手走人生路。謝霆鋒同王菲2000年「世紀拖手」將戀情曝光，3年後分手各自嫁娶，十多年後再重燃愛火，當大家都讚嘆緣份的奇妙時，一份1995年嘅雜誌剪報重見天日，令大家驚覺原來霆鋒早喺15歲時，已經認定王菲為理想對象，對比起緣份，更似勵志劇情，霆鋒努力追求自己所愛所想得到的結果。
謝霆鋒呢張女友視角圖，餵緊嘅會唔會就係女友王菲呢？(Facebook、微博圖片)
不再說我是「謝賢個仔」，稱謝賢做「謝霆鋒嘅爹哋」，今日看來已成真。(網上圖片)
微博有一位網友，上載一篇1995年出版嘅《明報周刊》訪問，當年15歲嘅謝霆鋒尚未正式入行，言談間看似稚氣未減，但22年後嘅今日睇番，訪問中卻句句似足預言，一一實現。當時記者問霆鋒覺得自己靚唔靚仔：「我認為男仔不應用靚來形容，男仔最緊要有型。（你有型嗎？）未夠好。」又提到背負星二代頭銜，自小為佢帶來不少壓力：「我希望將來人家不再說我是『謝賢個仔』，而是稱謝賢做『謝霆鋒嘅爹哋』。」今日睇番呢啲對話，全部都實現了。
+16
1995年嘅雜誌剪報出土，印證鋒菲戀的緣份。(微博圖片)
最神奇嘅一點，當年仲未成年嘅霆鋒，對已經站穩樂壇天后地位嘅王菲，默默種下愛嘅種子。記者問到霆鋒喜歡嘅女仔類型，佢好肯定的話：「唔要長頭髮，短短地好睇。外貌不是最重要，當然不可以太醜，性格最緊要，我喜歡爽朗的女仔，最怕那些連叫杯飲品也猶豫不決的女仔。」記者舉咗一個實例，當年代表兩大類型嘅女神 --- 周慧敏同王菲，有得揀會揀邊個做女朋友？「王菲。她衣著突出又有性格。」訪問後一年霆鋒正式入行，出道4年後就追到夢中情人，雖然曾經離合，緣份牽引下兜兜轉轉鋒菲再次喺埋一齊，成就美滿的結局。
在很多人心目中，鋒菲是天作之合。(視覺中國、Facebook圖片)
+13