【使徒行者2】被曹永廉踢爆已婚？　黃翠如被力捧忙到冇時間結婚

上回講到，黃翠如在《使徒行者2》見到心愛的周柏豪版袁偉豪一手隊冧，頓時傷心欲絕，馬上來個演技大爆發，哭一次不夠，哭夠三次才夠崩潰。網民看到翠如BB傾情的演出，紛紛大讚她演技有進步，就連前輩三哥都點名睇好她，覺得她可以憑這套劇問鼎視后。會否拿視后目前還是言之尚早，不過翠如BB得到TVB力捧就是事實，《使徒2》後，黃翠如在《溏心風暴3》都有份演出。

另一邊廂，她與蕭正楠感情穩定，經常傳出兩人快將結婚的消息。日前兩人的好友曹永廉生日，蕭正楠特意在微博祝福對方，卻被阿廉不經意地爆響口，笑蕭正楠「結咗婚係唔同D」，莫非兩人已經秘婚？黃翠如昨晚出席活動隨即否認此事，更笑言要封著曹永廉個嘴，坦言自己未有結婚的計劃。至於男方對於自己秘密做老襯一事，都好似與女方夾定，笑指曹永廉不可信，真真假假只有他們才知道。

剛才都有講到，黃翠如自加入TVB之後，工作量不斷增多，經常都會劇接劇，而且每套劇都是重頭劇、台慶劇，得到力捧之下，有說法指黃翠如連結婚都未必有時間，要將婚期稍為延遲衝衝事業先。不過，網民對於「如楠戀」都傾向睇好，覺得兩人很般配，感情似乎打風都唔甩，希望他們可以早日拉埋天窗，有喜事都不會反對。咦，黃翠如下星期一（23日）就生日，蕭正楠又會否製造驚喜，向她求婚呢？要拭目以待喇！