【反黑】陳國坤北上講吓Hello就賺錢 一年有一半時間休息

撰文:
最後更新日期:

周星馳近年雖退居幕後,但昔日與他合作過的「御用配角」,卻在國內發展得順風順水。陳國坤自《少林足球》、《功夫》後,被不少國內製作人所認識,08年更擔正中央台的《李小龍傳》。到國內掘金不外乎登台、商演、拍劇拍戲,但陳國坤卻是「say個Hi就可以搵到食」,完全係神級荀工。

「我拍親都係男主角,但無咩人睇過架喎,哈哈!」(江智騫攝)

因樣貌似足李小龍,令陳國坤非常輕易得到了《李小龍傳奇》一角,完全沒有爭崩頭的過程。「大陸競爭真係好大,佢哋狠心勁過香港人,一個女仔為爭取角色,可能唔止同導演上床,連副導、助手都係目標,做到滴水不漏。」雖說大陸比香港更難生存,但有些人總是幸運的,就好似當初《李小龍傳奇》的導演一見陳國坤,二話不說叫他馬上開工,但他卻左推右推,直到製作人李香凝親自出馬,得到了星爺的批准,他才接拍。「周生話咁你拍啦,唔好失禮龍哥就得。」

中央台首次起用香港藝人做男主角的《李小龍傳奇》。(網上圖片)

賺錢好慘

該劇創下了中央台近10年來最高收視紀錄,令他迎來了事業上的高峰。「果幾年最有市場價值,出嚟一句Hello、我愛你們然後拜拜就走得,再唔係就簽雙截棍丟給他們就可以,我09年完全無拍過任何作品,淨係Hello。」他說時配以打招呼的動作,連自己也忍不住狂笑。賺錢何其容易,但陳國坤說其實連Hello也不願意,原因是超討厭大陸的工作環境同氣氛。「大陸啲嘢好參差不齊,點解我而家咁堅持要做監製?就係因為試過在大陸拍劇時,他們為了讓我看起來不像李小龍,把我搞到不倫不類,好多次都因為對自己造型唔滿意,埋到位無心機,完全唔享受拍攝樂趣。」

陳國坤去年與Mr. Bean合作《歡樂喜劇人》,既沒有什麼人知道,也被網友評為年度爛片。《反黑》之後,陳國坤應該不會再接這些爛片吧?(網上圖片)

次次同導演嘈

除了工作環境之外,遇過不少工作態度欠佳的對手、導演也令陳國坤嬲到想殺人。「頭幾年係好唔慣,真係想殺死佢哋,成日都同導演嘈,試過嬲到一嗌cut我直接就上的士走人,助手都唔理。」在認識老婆黃伊汶之前,陳國坤一年有一半時間都在玩、休息,暑期更加不用旨意他到國內開工,現在回想起來,其實超幼稚。「後來識咗老婆就好啲,一來要賺錢二來佢會同我分析,同埋對耐咗識招架。」

陳國坤14年與黃伊汶結婚,並育有一子陳真,今年歲半。陳國坤之所以有《反黑》,有部分原因也是因為想跟陳真多點見面。(網上圖片)

想有啲嘢代表

《反黑》的成功,令陳國坤更確信接下來要往監製的路線走,一來不想再被搞到不倫不類,二來可以令自己更投入角色當中。「好想別人一提起陳國坤就會知道佢係乜,慢慢建立一啲化表到自己嘅嘢。」不過,首要條件是盡可能在香港發生。曾經可以離港兩三個月也不回來,現在拍攝合約寫明3個星期就要走一走,為嘅當然係兒子陳真。「佢出世之後,日日都學習中,以前佢丟東西,我哋會no,而家由佢,爛咗就無。他其實是我很多缺點的放大,所以這也令我成長很多,一啲壞習慣亦一下子都改掉了。」陳國坤從未幻想過今時今日所擁有的一切,更笑言一直以為自己會與宋本中浪迹天涯然後在片場死……

 

髮型︰Tim Chan
化妝︰Yannes lee @ ndnco.co

+2


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。