太陽現身澳門曬廣東話：多謝你哋嚟！ 預告BIGBANG 11月開Show
韓國天團BIGBANG成員GD同太陽今年就密密搵銀，分開單獨開Show之餘，仲世界各地來回飛，上個月太陽先嚟完香港開世巡個唱《TAEYANG 2017 WORLD TOUR WHITE NIGHT》，今日就巡到去澳門延續熱潮！
唔講唔覺原來太陽開咗咁多場演唱會，今次係首度舉行記者會！由華華娛樂、袖珍傳播聯合呈獻太陽澳門記者會於下午3點開始，太陽今日現身先以廣東話同大家打招呼：「大家好！Nice to meet you！This is Taeyang Thank you for coming today！」又即場再學廣東話講：「大家好！多謝你哋嚟！」仲講得都幾正㗎！太陽隨即分享今次世巡嘅感受，又講到雖然今次唔係以BIGBANG名義，而係以自己個人名義開Show，但可以見到世界各地唔同嘅V.I.P（BIGBANG粉絲名稱）心情都相當興奮！太陽又講到今次演唱會整體上嘅流程同其他場次一樣，不過澳門站就為咗V.I.P，準備咗全新嘅演出服裝，又有安排V.I.P入場睇綵排等等福利，佢自己都好期待今晚嘅演出啊！
而講到BIGBANG成員之間嘅感情時，太陽就表示：「大家聚埋一齊嘅時間已經超過10年，大部份時間都係一齊生活甚至一齊去廁所，又經歷過高潮起伏，隨住大家年齡增長，其實感情都一直增長緊。」而太陽結束今次個人世巡之後就會回歸BIGBANG，嚟緊11月BIGBANG都會喺韓國同埋日本舉行演唱會，而太陽本人就因為係2018年平昌冬季奧運會嘅宣傳大使，依家已經準備緊有關嘅唱片同埋音樂，嚟緊都仲有機會可以同大家見面！請大家多多期待！
更多太陽記者會圖片
我們01韓迷的facebook專頁Kpop 01已經開始喇！想知道更多韓國娛樂、飲食、玩樂、時尚資訊，快點去給like吧：https://www.facebook.com/hk01.kpop/