【港女講感情】Stephy分手後變自立　如果女友仲要依靠你應該感恩

鄧麗欣同方力申分手都成一年半，但每次出現喺傳媒面前，大家都不期然會將佢哋兩個聯想埋一齊，畢竟佢哋由螢幕CP戲假情真，變成真實情侶，加上導演葉念琛為佢兩個度身訂造嘅MK愛情電影三部曲（《獨家試愛》、《十分愛》、《我的最愛》），對唔少人嚟講係心目中嘅夢幻組合。

但可惜生活中唔係成日會有童話故事，雖然不時都有傳兩個人復合嘅消息，但分咗手之後Stephy多次訪問中都好斬釘截鐵講過唔會復合，佢話：「我覺得唔需要特別放低或者執着，大家順其自然過自己生活。」最近葉念琛套新戲，雖然仲有鐵膽方力申，但阿寶就唔再係Stephy喇，聽到都覺得SAD。

方力申分咗手之後，就醉心專注操肌，日日唔係跑步就係GYM舉鐵，唔覺唔覺，以前方力申明明係鋼條型，依家隻手臂大隻到成個The rock咁；而Stephy冇做阿寶之後，除咗私底下搞咗隊排球隊之外，仲接拍咗3部戲（《女士復仇》、《藍天白雲》、《空手道》），衝破自己嘅Comfort zone，唔再拍經典愛情戲，今年仲進軍埋電影節，佢接受訪問時講過依家拍戲同以前做阿寶好唔同，「平時拍嘅戲都係一個星期準備，今次要用半年時間，因為要學空手道。」的確，我哋依家見到嘅Stephy真係成長咗好多。

好多時都聽到大家會投訴女朋友唔夠成熟，太痴身會想佢獨立啲，但當佢真係清醒識諗嘅時候，第一件會做嘅事就係飛咗你！

前排喺討論區有個好hit嘅話題，就話「女仔單身久了，學會自己扭樽蓋」，一班港男就喺度抽水話班港女本身係咪小兒麻痺，扭樽蓋都唔識？但你要知道，叫男友幫手扭樽蓋絕對唔係因為自己扭唔到，背係原因係佢對你嘅依賴，聽唔明？即係明明煮飯、洗衫、拖地其實人人都識啦，有邊個真係自己做？大家唔係靠阿媽，就係點女友去做，問點解，又會話呢啲係女人應該做。雖然就話男女平等啫，其實不嬲都唔平等架啦！如果你女友叫你幫手扭樽蓋，你應該感恩，因為佢仲依賴你需要你，當佢可以自己扭嘅時候佢已經唔再需要你！