【使徒行者2】鄧梓峰巴斯光年成魔　成隊古惑仔變警察都冇人知？

《使徒行者2》今個星期已經去到結局篇，大家要估嘅臥底同黑警都已經揭盅得七七八八，上星期已經揭開了終極大黑警係鄧梓峰飾演的許Sir，其實都唔難估，因為出過鏡嘅警隊最高層就只有佢。佢一展現出係黑警之後，嗰個奸樣真係令到人有好大反應，唔係因為有幾奸，而係佢巴斯光年嘅形象實在太深入民心，搞到大家見佢睜大對眼兇魏德信（陳豪飾）嘅時候真係忍唔住笑。無人會懷疑十郎嘅演技，不過就真係唔太習慣佢演奸角，尤其係阿Sir嘅角色，因為大家都會立即諗返起喺《龍咁威》入面嘅鄧Sir，當年真係令人笑死唔少細胞。

以下內容有少量劇透，逃生門在此。

不過既然做得奸角就緊係要奸到盡，喺今日呢集許Sir唔只幕後操縱咁簡單，仲親手殺埋人，就係Madam Cheung嘅媽媽，事關佢認出許Sir就係當年同自己個囡拍拖嘅大隻豪。有啲觀眾可能未搞清楚個關係，其實大隻豪呢個前黑社會「雄鷹」的大佬，當年就係同Madam Cheung拍拖，之後佢殺死了真正的許Sir，仲取替埋佢嘅位置入咗警隊，估唔到TVB咁嘅劇情都做得出，又無乜交代，相信一個黑社會大佬要行入警局都有啲問題，而家仲要係取代喎。之後許Sir就開始將當時的黑社會成員偽裝做臥底混入警隊，Madam Cheung就係其中之一個，咁大工程嘅行動竟然無人發現，個個都無喺學堂出現過，又無學過警隊嘅嘢，都可以撈到咁高職位，相信呢班前古惑仔一定係精英中嘅精英喇。