林志穎大哥賣腸粉 細佬坐擁雙碩士兼係名嘴
如果用「人生勝利組」嚟形容林志穎，相信無咩人會反對。17歲一出道就爆紅，10月15號剛剛43歲，擁有自己嘅工作室、賽車車隊，仲有三個可愛嘅囝囝。最近林志穎嘅哥哥林志杰被發現，於台灣街頭賣腸粉，林志穎仲孖住三弟林志鑫親身到腸粉檔力撐大哥。對於網友議論紛紛，林志杰就好霸氣咁回咗一句：「林志穎的哥哥就不能賣腸粉嗎？」
根據網上資料，林志杰嘅腸粉檔已經營運兩個多月，生意不俗，起初媒體到場採訪時佢仲唔認自己係林志穎嘅哥哥，似乎唔太想叨巨星細佬嘅光，直到24號下晝，林志穎孖住三弟林志鑫親身到腸粉檔支持，林志杰先肯大方三兄弟合照。小志受訪時表示自己三個囝囝，都好鍾意食大伯煮嘅嘢食，佢仲即場向哥哥偷師學整腸粉添﹗小志其後亦喺FACEBOOK上載三兄弟合照：「平凡，不意味著不成功。就像腸粉，一種近在咫尺的快樂！我為大哥感到自豪～平淡才是真！」
林志穎父母在他小二時離婚，父親林德雄2011年過世，70歲的母親另有家庭。林德雄再婚後生1子林志龍、1女林志憶。林志穎家中排行第2，一共有5個兄弟姐妹，大哥早年於內地工作，為小志管理工作室以及時裝品牌生意，及後選擇帶埋老婆同兩個小朋友回流台灣。同小志一齊現身嘅三弟林志鑫，被網友指同小志最似樣非常帥氣，原來佢來頭亦絕不惹小，台大農業化學系畢業後，赴英取得倫敦大學企管碩士、倫敦政經學院資訊管理碩士，擁有雙碩士學位，活躍於電視節目。林志鑫追隨老哥熱愛超跑，被喻血液裡同樣流著汽油，擁有1輛要價千萬新台幣嘅McLaren，有「超跑達人」外號，活躍於電視節目的名嘴。
至於小志嘅四弟林志龍，曾經做過林志穎1年特別助理，而細妹林志憶外型甜美，當年林志穎經紀人夏玉順曾經想簽佢入行做明星，但佢表示無興趣，遠赴倫敦藝術大學攻讀服裝設計，畢業後做過市議員特別助理，12年結婚目前係一個家庭主婦。林家五兄妹自小感情非常好，從大哥林志杰到小弟的學費，林志穎都跟父親一起分擔，家人間感情深厚。