《獎門人》最強「獎金獵人」是誰? 原來洪天明出現次數未算最多

撰文:溫菁莉
出版:更新:

曾志偉一講「指定動作!多謝!」,相信大家一定會諗起獎門人節目,近日網紅King Jer就統計了拎得最多獎金獎品的嘉賓原來是洪天明,上過25次獎門人的他更被冠以「獎金獵人」稱號。其實根據非正式統計(應該無計錯),其實洪天明上過32次獎門人,但竟然有一個人比他多上一次獎門人,就是吳家樂,一共有33次!吳家樂接受《香港01》訪問時知道後,第一句就話,「下,乜我上得最多咩?唔係洪天明咩!」

根據非正式統計,吳家樂係上得最多獎門人嘅嘉賓!
+7
好多觀眾都好記得呢兩個獎品!

提到過往每一集獎門人最後的贏家都會得到獎品非常豐富,有2萬件的花之戀壽司及龜苓膏,有好多觀眾都好想問「2萬件壽司應該可以食一世」、「究竟係咪真係有咁多架?」。吳家樂就向我們證實係真嘅,「真係送咁多呀!當然唔係一次過俾2萬件壽司喇,一做完節目真係一大疊coupon送俾嘉賓。」他笑言無特別數過究竟有無食晒嗰2萬件壽司同龜苓膏,因為好多時候錄完節目後都會同其他嘉賓開心share,「我地大多數都會即晚係化妝間睇下大家想要邊啲,分嚟分去,可能我有壽司其他人有龜苓膏,睇下有咩啱用,咁大家起碼都有唔同嘅獎品,我都未試過要晒全部嘢。,我印象中有洪天明,劉曉彤,朱咪咪同林敏聰經常交換coupon。」

洪天明好後生呀!

家樂指因為coupon實在太多,多到好似一本電話簿咁,除了同其他嘉賓分享之外,都會送給節目的工作人員,「都會送返俾幫節目清潔嘅姐姐同化妝間嘅同事,佢地都好辛苦,唔會諗嗰價值係幾多,最緊要大家開心分享下。」節目除了壽司同龜苓膏之外,都會送總值30萬元的手袋,究竟點樣先可以用得完,家樂就話都係用coupon去換購,「嗰d真係明碼實價去換,可能有人會話係咪真架?真係有咁多嘢,你拎coupon鋪頭真係可以換返同樣價值的手袋。」他表示除非贏到的獎品是大型電器,否則大多數都是即日送出coupon給一眾嘉賓,「我印象最深刻贏過嘅獎品係一部50吋的電視機,因為唔係即晚拎走。」

吳家樂都話自己同洪天明可以話係獎門人嘅鐵腳。

另外有網友亦統計過洪天明,吳家樂以及鄧兆尊,幾乎每一集獎門人都見到他們的蹤影,係節目的常客。吳家樂在訪問中就透露是受獎門人曾志偉邀請,「因為本身我地幾個大家都係好friend,都係明星足球隊嘅成員,平時踢波嗰陣志偉都覺得我地幾個特別玩得,所以希望我地可以上下節目搞下氣氛,我同天明都可以話係鐵腳。」吳家樂雖然係上得最多獎門人,當被問到有無妒忌過好友洪天明贏咁多獎品,他笑言,「咁又唔會,獎金獎品都係開心嘢,無話一嚟到要就要乜,上咁多集獎門人要嘅係氣氛,唔係真係要嚟爭嘢搶嘢咁,如果唔係就無個個娛樂性咁豐富。所以我地都不怕地去盡力,去同其他嘉賓玩得咁癲,最重要可以帶到嗰氣氛俾觀眾。」

你可能感興趣