【降魔的】黃智雯原來超跳得　跳Kpop好有勁：熱愛到去演藝讀舞蹈

黃智雯向來外表都斯斯文文，所演的角色都是比較專業，多數做開Madam同醫生。就算最為人熟悉及經典的角色，都是《搜下留情》裡的「眼鏡妹」，成為了「宅男女神」，都離不開又pure又正經的形象。

不過，黃智雯最近做了些出人意表的行為。講到咁大件事，就係她多次在instagram上載了多條跳舞片。在片中，黃智雯大跳Kpop，有好些動作需要energy，既要fing頭亦要扭腰，少點氣力都不行。大家看慣她比較靜的一面，見到她跟著強勁節拍勁歌熱舞，都有點出乎意料之外，可以同舞后王君馨battle下。

唔講唔知，原來黃智雯畢業於香港演藝學院，主修舞蹈及戲劇，有開跳舞底子。不過，黃智雯入行十年，鮮有在觀眾面前跳舞，可算是深藏不露。《香港01》就問到Mandy，她就非常謙虛地說：「舞后，還未到家啦！」黃智雯平常唔洗開工，都會四周圍上堂，她憶起了在APA讀書上堂跳舞的回憶：「細個時，好鐘意MJ。會瘋狂跟著佢嘅MV video跳舞，熱愛到去讀演藝主修dance。以前每日返學朝朝9點開始上堂跳舞拉筋，只有10幾位同學，好大壓力，過程係辛苦的，慢慢會享受唔到跳舞的樂趣。到而家，反而無壓力，喜歡的就去跳，做返自己。」所以黃智雯之前都在公開場合扮過MJ跳Moonwalk。

黃智雯跳舞咁勁，大家都會好奇點解見唔到佢係台慶show off下呢？至少出嚟跳下肚皮舞都好吖。黃智雯就話入咗行之後，相比以前讀書接freelance 做下show賺外快現時多數專心拍劇，就算跳舞都要偷時間。講到對外表演，黃智雯對拍音樂劇更為有興趣：「有機會都好想拍到有舞蹈音樂原素的劇集。」歌舞元素的影視作品，好似上年的《La La Land》掀起了熱潮，觀眾都好受落。如果嚟返個TVB版《La La Land》，並由Mandy擔正，似乎都好有睇頭喎！黃智雯聽完都話恨拍：「勁鐘意！ 一直好期待香港能夠有一套原創音樂劇製作！」咁就要一人一集氣，推黃智雯做TVB音樂劇女主角喇！