《反黑》第二季有份做古惑仔？　經典奸人黃子揚：我未知有呢件事

有「經典奸人」之稱的50歲黃子揚，90年代做過多個奸人角色，最為人熟悉就是1999年《賭俠1999》做衰警察、以及2000年《刀手》做古惑仔。不過近年他全心全意在內地發展，甚少見過他在香港出席公開場合。原來他在2009年受洗，成為了基督徒。結婚又離婚，一個月前與小20年的外籍女友Li.Qiak結婚。直到今日，黃子揚少有地出席公開場合，帶埋老婆返到TVB出席MyTV SUPER與創世電視的簽約儀式。

早前網劇《反黑》超有人氣，監製之一陳國坤講到明會開第二季。而黃子揚古惑仔形象深入民心，有傳他有份參與《反黑》第二季，《香港01》親身求證後，黃子揚就話：「好多人都咁問，但我未知有呢件咁嘅事。我聽過其他嘅演員喇，佢哋都話好恨拍。」近年TVB都喜歡搵舊將回巢拍劇，出身無綫的黃子揚又有冇份呢？佢話：「有傾過計嘅，但合唔合作就要睇返工作配唔配合到，都要睇返神嘅安排。」

講到自己原來是「經典奸人」，他覺得幾得意，不過信了主的黃子揚，會否再做奸人角色？他再說：「要再睇下尺度點樣，因為有時做奸人都唔係好出得街，如果有機會嘅，都可以嘗試下，不過都要睇返神嘅安排。」黃子揚全力在內地工作，也沒有回流返港的意思，因為內地的地大，機會又多。被問到香港而家都多咗電視台，都叫做多咗機會畀藝人，問到會否試下不同平台演出，他還是說：「睇機會喇，都要神安排。」