【宋宋結婚】宋仲基宋慧喬婚禮遭直播　章子怡老公汪峰係主使人？

宋仲基宋慧喬尋日下晝，於首爾新羅飯店迎賓館舉行婚禮，250名親友見証下正式結為合法夫妻。不過如果計埋網上，應該全球數以十萬計網友一齊睇先啱，因為內地「碎樂娛樂」於微博直播整場婚禮，估計係事先BOOK咗最有利嘅酒店房間，並以長鏡頭拍攝，令到韓媒及雙宋粉絲非常不滿，覺得太唔尊重一對新人。
有網友更發現該公司法定代理人原來係章子怡老公汪峰，加上章子怡又受邀參加婚禮，令人質疑「參加婚宴順道當狗仔隊？」

韓媒抨擊直播雙宋婚禮毫無媒體道德，章子怡登上韓國搜尋網第五位，一對新人反而影都無。(微博圖片)

宋慧喬同章子怡因《一代宗師》結緣。(資料圖片)

2013年一套《一代宗師》，令宋慧喬同章子怡結緣，後來又再一齊拍攝《太平輪》及《太平輪：驚濤摯愛》變成好友。去年章子怡同宋仲基合作拍化妝品廣告時，OPPA就曾經抱章子怡囡囡醒醒合照，因此雙宋宣布結婚後，章子怡收到喜帖就排好行程親赴韓國參加婚禮。雖然雙宋一早講咗不設媒體訪問，不過全亞洲媒體都紛紛派員於酒店外採訪，章子怡亦悉心打扮早早到場，仲非常「體貼」，留步兼多角度俾傳媒影相交差，同其他韓國藝人落車速速行入酒店形成好大對比。

章子怡一早到達婚禮現場，風騷向傳媒揮手。(視覺中國)

身為國際巨星，章子怡好識照顧各方傳媒，多角度企定擺POSE。(視覺中國)

碎樂娛樂直播中不時「碰巧」影到章子怡，參加朋友婚禮的確要影多啲相留念。(微博截圖)

中午後網友發現「碎樂娛樂」流出大量場內照片，甚至有直播影片，於片中可以見到章子怡不時喺婚禮現場影相，証婚後大合照企正中間傍住一對新人，仲攬住喬妹錫錫，感情睇嚟相當深厚。亦多得章子怡到微博留言祝賀雙宋，仲「大愛分享」上載三張超高清相片，成為各大媒體爭相轉載，兼用嚟分析喬妹嘅婚戒花球來頭。

多得章子怡率先上載雙宋高清大圖，傳媒先可以有圖有真相，為婚戒和花球起底。(章子怡微博)

為咗雙宋婚禮，幾乎全亞洲媒體都逼喺酒店門口，甚至出動航拍機想捕捉兩人婚禮時刻。不過同一時間，「碎樂娛樂」就以高空視角直播雙宋婚禮全部過程，更大方在網上直播，配以詳盡嘅場內旁述，被韓媒抨擊毫無媒體道德。有內地網友發現碎樂大股東正正係章子怡老公汪峰，推敲收到喜帖後就開始計劃呢次直播事宜，如果屬實，雙宋真係要好好「多謝」章子怡呢位好姐妹啦。

神通廣大嘅網友發現，章子怡老公汪峰正正係碎樂大股東。(微博圖片)

咁多人一齊同雙宋合照，章子怡都可以企正中間，果然地位非凡。(微博圖片)

【宋宋結婚】宋仲基宋慧喬婚禮遭直播 章子怡老公汪峰係主使人？

【宋宋結婚】宋仲基宋慧喬婚禮遭直播　章子怡老公汪峰係主使人？