FOX推出手機平台TVB無掟企? 葉念琛:資金夠我拍幾套電影

撰文:林迅景
出版:更新:
大佬孝同小紅姐,大家想唔想睇?(黃國立攝)

美國的福斯傳媒集團FOX年頭開始拓展華語劇集市場,而且非常重本。目前就有兩套已經完成的迷你劇,由劉德華監製的《香港華爾街》以及葉念琛執導的《心冤》。消息一出就已經震驚700萬人,因為聽到美劇創作喎!係香港點會有?所以都一鍵留名,好期待咁話!

就係今日,FOX就舉行發布會,除咗公開兩套華語迷你劇的預告片之外,仲有件好爆嘅事要講,就係FOX都出手機App「FOX+」,有咩咁吸引?就梗係睇呢兩套劇喇!話到明係FOX,當然有埋電影睇,佢仲會包埋「FOX Movies」、「FOX Action Movies」等。就可以一個申請、二人同步,一個月畀$188任睇。直頭用手機平台硬撼MyTV SUPER!

《心冤》嘅演員今日都有亮相。(黃國立攝)

據知TVB嘅MyTV SUPER至尊版一年畀$1880,相對嚟講,FOX+一個月百幾蚊又好似貴咗少少,但係有得美式、有外國感覺嘅港劇,大家又制唔制呢?而今次執導FOX重頭劇《心冤》嘅葉念琛,佢就對FOX讚不絕口,因為好揼本!佢話:「拍劇嘅資金真係非常充裕,個成本真係比我拍電影多好多。」究竟有幾多?佢再講:「可以畀我拍多幾套港產電影!」嘩!咁講法,真係要睇下拍成點喇!

葉念琛拍懸疑片,可以一戰。(黃國立攝)