【心冤】葉念琛繼續有阿寶情意結 今次竟然係佢取代鄧麗欣?

撰文:林迅景
出版:更新:
葉念琛拍懸疑劇…有冇信心?(黃國立攝)

美國的福斯傳媒集團(FOX)推出迷你華語劇,將會在2018年第一季播出懸疑劇《心冤》,有惠英紅同黃秋生等重量級人馬。不過當大家知道係由葉念琛執導嘅時候,大家都不禁好驚訝:「乜葉念琛都會拍懸疑片㗎咩?」冇錯!你冇睇錯!佢就係撈埋電視個瓣!有「旺角活地亞倫」之稱嘅佢,對今次《心冤》作品好滿意:「呢套劇超越好多電視嘅尺度,尤其係血腥場面!」

小紅姐係最新嘅阿寶喇!(黃國立攝)
STEPHY係第一代阿寶。(網上圖片)

講起葉念琛,都會諗起一堆「愛」字系列電影,每套嘅女主角嘅名都會叫阿寶,呢個係葉念琛嘅情意結。咁拍電視劇,仲要係懸疑片,呢個習慣會唔會有所改變?答案係冇!《心冤》女主角惠英紅就揭秘,話自己今次叫做「Madam Bo」,都係叫做阿寶,係最老嘅阿寶。而葉念琛就搞笑地話:「係攞得最多獎嘅阿寶!」咁Stephy咪…無論點都好,有葉念琛就會有阿寶,而阿寶就會以唔同方式呈現畀觀眾。

大家期唔期待呀?(黃國立攝)

葉念琛撈多瓣,佢坦言越拍越有興趣,一來FOX嘅水喉好充足,二來佢都唔想只拍愛情片,「電影點都會拍,我一直做緊(愛情電影)嘅都會拍,但電視劇有幾個都仲搞緊。」至於係咩電視劇呢?葉念琛就保持神秘喇。