【森美旅行團】浸溫泉爆肌上圍仲勁過高Ling　森美：呢個唔係重點

森美大哥一向都係大台嘅寵兒，之前孖住小儀拍過資訊遊戲節目《千奇百趣》，介紹日本趣怪事，因為反應好已經翻啅咗好多次，之後又一拖六帶住班𡃁妹「是非精」拍《學是學非》，教大家唔少生活上嘅冷知識，依舊好受大家歡迎。既然個勢咁好，今次就繼續由森美用知性方式帶大家去旅行，《森美旅行團》一出街之後網民大讚，話平時聽森美電台個節目《早霸王》已經覺得佢轉數快，估唔到做旅遊節目質素仲高，吸收到好多知識咁話。

其實睇得多杜如風嘅吃喝玩樂、瘋狂Shopping《東京攻略》多，可能都會有啲飲飽食滯。反而睇吓森美大哥嘅小品家庭式旅遊節目都幾寫意，佢有別於杜如風嘅飲飲食食風，行嘅平民家庭樂，揀啲一家大細都適合去嘅路線，好似搭火車就食幾百yen嘅火車便檔；浸溫泉又推薦划算嘅「日歸」玩法（早上十點到下午一點就係日歸）；就算去到東京都唔一定Shopping，原來仲可去撐船釣魚，真係估佢唔到。

有得森美係度，當然唔少得過大家幾招同大家上吓堂，話晒森美都係「喇沙仔」，中大畢業之後仲做過Lecturer，就算食隻天婦羅都可以講到段故，原來天婦羅唔係日本自創，而係葡萄牙傳入嚟，就連食松茸都可以搭到幾句嘴，真係好似睇緊《學是學非》咁，長知識了！如果話杜如風係嗰本「閃令令」嘅旅遊書，咁森美就係旅遊界嘅Lecturer！今日（3日）森美同小儀喺《早霸王》度講起溫泉呢一幕，尋日（2日）節目見森美好瀟灑咁除咗佢條浴巾，小儀就八卦問佢係咪真係真男人全裸上陣，森美就懶神秘咁話：「呢個唔係重點啦！」森美有份主演的《誇世代》下周一(6日)就出街，相信到時大哥會再變焦點啦！